Учесници на пазарот на капитал

ЗА КХВ

Комисијата за хартии од вредност на Република Македонија (КХВ) е основана на 19.06.1992 година со Одлука на Владата на Република Македонија со седиште во Скопје.

КХВ е самостојна и независна организација со својство на правно лице.

КХВ ја сочинуваат седум членови, од кои еден е претседател. Согласно член 159 од Законот за хартии од вредност од 2000 година, членовите и претседателот на КХВ ги именува Собранието на РМ на предлог на Владата на РМ.

КХВ формира Стручна Служба со која раководи директор. Стручната Служба на КХВ е составена од четири сектори и тоа: Сектор за општи и правни работи, Сектор за давање одобренија, Сектор за контрола на пазарот на капитал и Сектор за истражување и анализа и меѓународна соработка на пазарот на капитал.

КХВ врши регулирање и контрола на сите учесници во работењето со долгорочни хартии од вредност во РМ.

КХВ е одговорна за спроведување на Законот за хартии од вредност и Законот за инвестициони фондови, Законот за превземање на акционерски друштва, како и на сите подзаконски акти донесени врз основа на овие закони.

КХВ, во рамките на своите законски надлежности и овластувања, е одговорна и за законито и ефикасно функционирање на пазарот на долгорочни хартии од вредност и за заштитата на правата на инвеститорите, со цел постојано јакнење на довербата на широката јавност во институциите на пазарот на долгорочни хартии од вредност во РМ.

КХВ ги врши следните функции:

• Презема мерки за обезбедување и спроведување на Законот за хартии од вредност и други закони во нејзина надлежност;
• Донесува акти, односно правилници кои произлегуваат од Законот за хартии од вредност и други закони во нејзина надлежност;
• Презема мерки за обезбедување и спроведување на актите, односно правилниците донесени во согласност со Законот за хартии од вредност и други закони во нејзина надлежност;
• Врши контрола на целокупната документација кај субјектите издавачи на хартии од вредност, презема мерки и донесува одлуки за заштита на интересите на лицата кои се сопственици или инвестираат во хартии од вредност и спречува нечесни и незаконити дејности поврзани со работењето со хартии од вредност ;
• Издава одобренија кои произлегуваат од Законот за хартии од вредност и други закони во нејзина надлежност;
• Го регулира начинот на тргување со хартии од вредност на Берзата и пазар преку шалтер;
• Ги следи и ги контролира активностите на брокерските куќи и банките во работењето со хартии од вредност, како и овластени друштва за управување со инвестиции, односно инвестиционите фондови;
• Врши контрола над работењето на Централниот дерпозитар за хартии од вредност;
• Одредува стандарди на конкуренција меѓу брокерските куќи и банките во работењето со хартии од вредност, како и овластените друштва за управување со инвестиции, односно инвестиционите фондови, по пат на проверка или на друг начин;
• Дава согласност за именување и разрешување на раководните лица од Законот за хартии од вредност и на раководните лица во друштвото за управување со инвестициони фондови од Законот за инвестиционите фондови;
• Ги одобрува јавните повици што се издаваат во врска со јавна понуда на хартии од вредност;
• Се грижи за законит, чесен и транспарентен пазар на хартии од вредност;
• Ги одобрува правилата на пазарот на хартии од вредност кои се однесуваат на котацијата на хартиите од вредност и обврските за јавност на податоците за друштвото и периодични извештаи од страна на котирани друштва;
• Соработува со други институции во Република Македонија и надвор од неа по пат на размена на информации и на други начини;
• Го пропишува начинот и постапката на тргување со долгорочни хартии од вредност издадени во Република Македонија со кои ќе се тргува надвор од границите на Република Македонија;
• Ги пропишува условите за учество на овластените учесници на Берзата при тргување на странски берзи;
• Донесува акти, односно правилници за внатрешната организација на Комисијата и
• Врши други работи во врска со работењето со хартии од вредност согласно Законот за хартии од вредност.