Ако одзивот по јавниот повик за учество во Европскиот квиз на пари е некаков показател, лесно може да се дојде до заклучок дека нашите деца брзо ќе мора да почнат да ги вртат страниците на книгите за пари и финансии. На повикот за учество на овој квиз се пријавени 145 класа од основните и средни училишта од сите четири страни на нашата држава. Реакција  поголема од очекувањата, со оглед на тоа што тој по прв пат се одржува во нашата земја, на оние кои ја почнаа акцијата Комисијата за хартии од вредност на Република Македонија заедно со Министерството за образование и наука на Република Македонија, Македонската банкарска асоцијација и Народната банката на Република Македонија  организатори на квизот имаат една цел – едукација за финансиска писменост на младите на возраст од 13 до 15 години.

Што се парите, кога настанале, каде се печатат, кој ги издава, кој ги чува се дел од прашањата на кои тинејџерите од нашата земја треба да даваат одговори. Ќе треба да знаат и што е кредит, камата, профит, курсна разлика ... Што се акции, каде и како се купуваат или продаваат,  како да се заштити од компјутерски  измами.  Многу прашања кои  македонската иднина треба набрзина да ги научи и  совлада.

Квизот инаку се одвива во две фази, од која првата се националните првенства во земјите учеснички за време на Европската недела на парите и финален натпревар кој се одржува во Брисел (Кралството Белгија) на 7-ми мај годинава.

Натпреварувањето во Македонија ќе започне на 13 март кога ќе се спроведе првиот подготвителен тест во сите класови/одделенија во школите кои пријавиле учество, за да една недела подоцна се одржи и вториот подготвителен тест. Најдобрите два ученика по овие два теста ќе настапат на  финалниот натпревар, кој  ќе се одржи во Скопје на 27 март, по кој ќе бидат познати победниците кои ќе ја претставуваат Република Македонија на Европскиот квиз на парите во Брисел.

И на националните натпревари, како и на завршницата во Белгија, учесниците тестовите ќе ги полагаат на својот мајчин јазик.