На 26 мај (среда), Комисијата за хартии од вредност заедно со останатите компании во државата, адвокатски канцеларии и сметководствени бироа учествуваше на Oтворениот ден за промоција на стручните смерови при Средното економско и правно училиште “Арсени Јовков” од општина Чаир.

Согласно потпишаниот Меморандум за соработка со Средното економско и правно училиште “Арсени Јовков” од општина Чаир, Комисијата за хартии од вредност ќе продолжи да учествува во активности за подигнување на квалитетот на средното стручно образование, стручно усовршување на наставниот кадар, но пред се во подигнувањето на свеста за финансиска писменост и практичното знаење на средношколците.

На самиот настан, Комисијата за хартии од вредност со свој штанд го презентираше работењето и функцијата на регулаторот на пазарот на хартии од вредност и одговараше на прашањата кои ги имаа присутните лица.

На учениците, преставниците од Комисијата за хартии од вредност им поделија примероци од Поимникот на основните поими од областа на хартии од вредност, како и едукативниот флаер кој Комисијата го подготви за учениците насловен “Запознајте се со Комисијата за хартии од вредност”.

Комисијата за хартии од вредност и во иднина ќе ги поддржува активностите за подигнување на квалитетот на средното образование и наставните програми се со цел практичната настава за учениците да даде одлични резултати и успеси во едукацијата.