На 22.02.2019 година, Комисијата за хартии од вредност на Република Северна Македонија учествуваше на работната средба со наставниците и професорите, координатори од основните и средните училишта од земјава кои ќе учествуваат во Европскиот квиз на парите. Беа презентирани одделните фази и се спроведе обука за подготовка за натпреварот, кој во организација на Македонската банкарска асоцијација, Комисијата за хартии од вредност, Народната банка и   Министерството за образование и наука по првпат се одржува во нашава земја, чија цел е финансиска едукација на младите од 13 до 15 години. 

На средбата се обратија: гувернерката на Народната банка, д-р Анита Ангеловска-Бежоска, заменик-министерот за образование и наука проф. д-р Петар Атанасов и претседателот на Македонската банкарска асоцијација, г. Коста Митрески. Потоа беа презентирани материјалите за финансиска едукација од Народната банка во областа на личните финансии, пари и банки, заедно со осврт кон прашањата за квизот, од страна на главниот економист д-р Анета Крстевска. Додека пак, материјалите за подготовка за квизот од областа на инвестициите и пазарот на хартии од вредност на Комисијата за хартии од вредност на Република Северна Македонија беа презентирани од страна на м-р Ивана Бољат.

На координаторите им беше укажано и за севкупната административна процедура за одржување на квизот. Натпреварот за Европскиот квиз на парите ќе се одвива во три фази. На 13 март ќе се спроведе првиот подготвителен тест во рамки на пријавените одделенија, односно класови, а една недела подоцна ќе се одржи и вториот подготвителен тест. Најдобрите по овие два теста ќе настапат на финалниот натпревар, којшто ќе се одржи во Скопје на 27 март, по кој ќе бидат познати двајцата најдобри ученици кои ќе ја претставуваат земјата на Европскиот квиз на парите во Брисел, на 7 мај годинава.

Се очекува дека овие активности поврзани со квизот значително ќе придонесат за подигнување на нивото на финансиска едуцираност на најмладите од земјава.