Прогласени победниците на Националниот натпревар на ученички компании за учебната 2020/2021 година
02.06.2021
Во рамки на реализацијата на активностите кои придонесуваат кон подигање на свеста кај најмладите за финансиската писменост, Комисијата за хартии од вредност на Република Северна Македонија се вклучи во уште еден од проектите на Џуниор Ачивмент Македонија и тоа со свој претставник во жири комисијата за избор на најдобрата ученичка компанија за учебната 2020/2021 година.

Завршната церемонија за доделување наградите на Националниот натпревар на ученички компании за учебната 2020/2021 година, се одржа на 31-ви мај на YouTube каналот на Џуниор Ачивмент Македонија, со почеток во 17:00 часот на која беа прогласени првите три места и тоа по следниот редослед:

Прво место за ученичката компанија на учениците од СУГС „Никола Карев“ од Скопје насловена “Life Pal”,

Второ место за ученичката компанија на учениците од СУГС Гимназија „Јосип Броз Тито“ од Скопје насловена “TechBook” и

Трето место за ученичката компанија на учениците од СУГС „Кочо Рацин“ од Скопје насловена “Grow Green”

На овогодинешниот натпревар учествуваа 23 ученички компании од 14 средни училишта од земјава. Победникот ќе има можност да се претстави на Европскиот натпревар на ученички компании, кој оваа година се организира од Џуниор Ачивмент Европа и Џуниор Ачивмент Литванија.

Покрај наградите за најдобри ученички компании, на церемонијата беа прогласени и наградите за најдобар наставник и најпретприемничко училиште во програмата на Џуниор Ачивмент Македонија за изминатата учебна година, како и победникот на Конкурсот за етичка дилема и ученичката компанија која најуспешно ги прикажа научените вештини за претставување на социјалните мрежи и преку промотивното видео, како и тимскиот дух.

Прогласувањето на победниците можете да го погледнете на следниот линк: https://www.youtube.com/watch?v=k5YYoV2yMhw