Комисијата за хартии од вредност на Република Македонија денеска на 17 декември, 2018 година склучи меморандум за соработка со Македонската банкарска асоцијација, Министерството за образование и наука и Народната банка на Република Македонија. Меморандумот главно се однесува  на соработката во сферата на финансиската едукација на младата популација и финансиската писменост на населението, како и на други прашања од областа на финансиите.

Во рамки на оваа соработка, Комисијата за хартии од вредност на Република Македонија и трите институции, за првпат во нашава земја ќе го организираат „Европскиот квиз на парите", којшто е проект на Европската банкарска федерација, наменет за финансиска едукација на младите. Со тоа, Република Македонија се вклучува во второто издание на овој квиз, чија основна цел е финансиска едукација на учениците на возраст од тринаесет до петнаесет години. Се очекува дека во квизот ќе учествуваат над четириесет илјади ученици од дваесет и пет европски земји.

„Европскиот квиз на парите" се одвива во две фази – првата се националните  натпревари во секоја земја поединечно, а втората е европското финале. Националниот натпревар во Република Македонија ќе се одржи на 27 март 2019 година, во рамки на Европската недела на парите. Најдобрите двајца ученици ќе ја претставуваат нашата земја на финалето коешто ќе се одржи на 7 мај 2019 година во Брисел, Белгија. Организацијата на овој настан во нашата земја ќе придонесе за поголема ангажираност на младите во доменот на финансиската едукација и за збогатување на нивните знаења од сферата на финансиите.