Студентите од  Факултетот за бизнис и економија при Универзитетот на Југоисточна Европа на 10 декември, 2019 година беа во едукативна посета на Комисијата за хартии од вредност.

Студентите имаа прилика да се запознаат со основните функции на регулаторот, историјатот и со постапката  за спроведување мониторинг врз тргувањето со акции и обврзници.

Добредојде им посака Претседателот на КХВ М-р Нора Алити која потенцираше дека финансиската едукација  на младите е во центарот на делувањето на КХВ, бидејки истата ја разбира како процес со кој младите го подобруваат своето знаење во врска со финансиските производи, концепти и ризици и преку практични обуки се стекнуваат со информации и вештини околу финансиските  можности.

Претседателката Алити истакна дека парите и финансиската одржливост се несомнено значаен дел од секојдневниот живот, а управувањето со средствата може да биде навистина голем предизвик. Од особена важност е секој поединец да умее паметно да управува со своите средства, па тие како носители на иднината на нашава земја  ќе треба да ги научат и да ги совладаат предизвиците кои ги има во областа на финансиите и на економијата.

Низ исцрпни презентации, претставниците на КХВ од Секторот за супервизија на пазарот на капитал се осврнаа на главните аспекти на надлежностите на КХВ како регулатор, а одговараа и на прашања од студентите  коишто со интерес ги проследија презентациите.

Со овој настан, но и со серијата посети што се случуваат, Комисијата за хартии од вредност  продолжува во континуитет да обезбедува соодветна едукација и запознавање на младите со случувањата на пазар на капитал.