Спроведени контроли

Комисијата за хартии од вредност и во февруари секојдневно on-line во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за контрола на пазарот на капитал спроведе 20 (дваесет) вонредни контроли.

Регистар на акционерски друштва со посебни обврски за известување

Во февруари вкупно активни акционерски друштва беа 141. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Меѓународна соработка

Претседателот на Комисијата за хартии од вредност Марина Наќева-Кавракова на крајот на февруари оствари работен состанок со претставници на Светската банка и со тим од Владата на Република Македонија задолжени за ,, Doing Business Project,,. На средбата се разгледани можностите за измена на законската регулатива со која се уредува објавувањето на податоци за големите зделки и зделките со заинтересирана страна, односно во годишните извештаи на акционерските друштва да бидат дадени информации за големината на трансакцијата и начинот и постапката за нејзиното одобрување, како и објавување на податоци за фактите кои се однесуваат на заинтересираната страна. Освен тоа, потребно е да се обелоденуваат и сите информации кои говорат за било каков конфликт на интереси или пак дека е склучена определена зделка која е на штета на малцинските акционери.

Преземања на акционерски друштва

Комисијата за хартии од вредност донесе решение со кое се утврдува за успешна понудата за откуп на обичните акции издадени од Силекс банка АД Скопје дадена од Централна кооперативна банка АД Софија, Република Бугарија. Врз основа на оваа понуда, Централна кооперативна банка АД Софија се стекна со 136.658 обични акции, кои обезбедуваат учество од 62,57% од акциите со право на глас од Силекс банка АД Скопје. Согласно законските прописи, Централна кооперативна банка АД Софија ја извести Комисијата за хартии од вредност дека понудата за откуп на 183.388 обични акции ја прифатиле вкупно 107 иматели на обични акции кои доставиле изјави за вкупно 136.658 обични акции издадени од Силекс банка АД Скопје и дека понудата за откуп е успешно реализирана. Откупот на хартиите од вредност се изврши по цена од 4.791 денари по акција. Врз основа на известувањето за исходот од понудата за откуп и по целосно утврдување на фактичката состојба, согласно член 43 од Законот за преземање на акционерските друштва, Комисијата за хартии од вредност го донесе решението за успешност на понудата. Земајќи ги предвид и 35.000 обични акции што бугарскиот инвеститор претходно ги поседуваше во Силекс банка АД Скопје, Централна кооперативна банка АД Софија вкупно ќе има 171.658 обични акции, односно 78,60% од акциите со право на глас издадени од Силекс банка АД Скопје.

Подзаконски акти кои произлегуваат од законите во надлежност на КХВ

По јавната расправа, каде јавноста имаше можност да ги каже своите забелешки и сугестии, Комисијата за хартии од вредност во февруари ги усвои следниве правилници: 1. Правилникот за изменување и дополнување на Правилникот за начинот и условите за полагање на стручен испит за работење со хартии од вредност; 2.Правилникот за определување на формата и содржината на Проспектот и поканата за запишување на хартии од вредност; 3. Правилникот за определување на други документи потребни кон барањето за одобрение за издавање на хартии од вредниост; 4. Правилникот за содржината на соопштението за издавње на хартии од вредност чии вкупен износ не надминува над 25.000 евра во денарска противвредност. Исто така, КХВ во февруари ги разгледа и следните предлог-Правилници: 1.Предлог-Правилникот за начинот и постапката на издавање, понуда и продажба на деривативни финансиски инструменти на примарниот пазар, тргувањето со деривативните финансиски инструменти на секундарниот пазари порамнувањето и утврдувањето на овие трговски трансакции; 2.Предлог-Правилникот за измени и дополнување на Правилникот за времето и начинот на обелоденување на ценовно чуствителни информации на акционерско друштво со посебни обврски за известување; Овие Предлог-правилници одат на јавна расправа. Јавната расправа се обезбедува преку веб страницата www.sec.gov.mk на Комисијата за хартии од вредност

Обуки

Во функција на подигање на знаењето на студентите од областа на акционерството и воопшто за светските трендови на пазарите на капитал, како и заради поттикнување на младите генерации својата иднина да ја гледаат токму во овој дел од финансискиот пазар, Комисијата за хартии од вредност одлучи на приватните универзитети бесплатно да им додели комплети од 9-те книги кои се во издание на КХВ. Досега, оваа стручна литература веќе е доставена и се користи од страна на сите државни високо-образовни институции кои третираат проблематика од областа на пазарот на капитал.

Активности по барања на акционери за заштита на правата

Во февруари, Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ доставени се 12 (дванаесет) барања за заштита на акционерски права. Дел од акционерите бараат поништување на трансакции, а некои од нив не се согласуваат со бројот на акции кои се водат во Централниот депозитар за хартии од вредност АД Скопје.

Супервизорски (надзорни) активности на КХВ

Комисијата за хартии од вредност издаде согласност лицето Крсте Шајноски да биде директор на брокерската куќа Еуро Брокер АД Скопје.Согласноста за именување на Крсте Шајноски за директор на Еуро Брокер АД Скопје се дава за период од четири години. Шајноски доаѓа на местото на Зоран Мајнов.