Подзаконски акти

Комисијата за хартии од вредност на Република Македонија во ноември го усвои Правилникот за формата и содржината на прекршочен платен налог, откако претходно беше на јавна расправа. Исто така, КХВ разгледа неколку предлог правилници и истите ги стави на јавна расправа, со цел јавноста да ги каже своите забелешки во однос на подзаконските акти.Станува збор за: 1.Предлог правилник за формата, содржината и начинот на водење на Регистар на единствена евиденција на прекршоците, изречените прекршочни санкции и донесените одлуки и Регистар на издадени прекршочни платни налози и начинот на пристап до информациите од Регистарот; 2.Предлог правилник за начинот на потврдување на прифаќање на налог за тргување со хартии од вредност; 3.Предлог правилник за содржината и начинот на водење на книгата на налози;

Решенија за емисии на акции

Комисијата за хартии од вредност на Република Македонија на Друштвото за производство на производи со посебна намена "11 Октомври - Еурокомпозит" АД Прилеп му даде одобрение да издаде четврта емисија на долгорочни хартии од вредност по пат на приватна понуда. Станува збор за 128.702 обични акции во вредност од 40.553.457,00 денари. Со четвртата емисија на акции се врши зголемување на основната главнина на Друштвото за производство на производи со посебна намена "11 Октомври - Еурокомпозит" АД Прилеп со непаричен влог, наменета за Република Македонија, со што акциите ќе бидат преземени од страна на Владата на Република Македонија како институционален инвеститор. КХВ на Акционерското друштво во државна сопственост за вршење на дејноста давател на услуги во воздухопловна навигација М-НАВ АД Мралино, Илинден му даде одобрение да издаде втора емисија на акции по пат на приватна понуда. Станува збор за 71.202 обични акции во износ од 71.202.000 денари. Со овие средства кои се дел од добивката на М-НАВ АД Мралино, Владата на Република Македонија како единствен акционер ја зголемува основната главнина на друштвото.

Преземање на ационерски друштва

Комисијата за хартии од вредност на Република Македонија донесе Решение со кое понудата за преземање на акции од Друштвото за производство и трговија Пелистерка АД Скопје што ја даде Трговското друштво за вработување на инвалидни лица за производство и трговија Цип Продукт ДООЕЛ Скопје се утврди за успешна. Понудата за преземање била прифатена од вкупно 42 сопственици на обични акции со право на глас во Пелистерка АД Скопје кои поседуваат вкупно 10.975 обични акции што претставува 26,51 % од вкупниот број на обични акции со право на глас,односно 21,87% од вкупниот број на сите издадени хартии од вредност на Пелистерка АД Скопје. Врз основа на оваа понуда, преземачот- Цип Продукт ДООЕЛ Скопје се стекна со 10.975 обични акции, па заедно со акциите што веќе ги поседуваше има вкупно 35.316 обични акции што претставува учество од 85,3% од вкупниот број на обични акции, односно 70,38% од вкупниот број на акции издадени од Пелистерка АД Скопје. Преземањето на хартиите од вредност се изврши по цена од 2.100 денари по акција.

Регистар на акционерски друштва со посебни обврски за известување

Во ноември, вкупно активни акционерски друштва беа 18. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Дозволи за брокери

Комисијата за хартии од вредност на Република Македонија обнови седум дозволи за работење со хартии од вредност и тоа на лицата: 1.Зоран Трифуновски; 2.Кирил Митровски; 3.Маја Костиќ; 4.Ѓорѓи Палевски; 5.Ѓоко Алексовски; 6.Тони Павловски; 7.Жарко Атанасовски;

Спроведени контроли

Во ноември , Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал во ноември спроведе три редовни контроли.