Преземања на Акционерски друштва

Во април Комисијата за хартии од вредност на РМ го донесе решението за успешност на понудата за откуп на обичните акции издадени од Охридска банка АД Охрид дадена од Сосиете Женерал (Société Générale, SA). Сосиете Женерал (Société Générale, SA) се стекна со 166.022 обични акции, кои обезбедуваат учество од 51,47 % од вкупниот број акции со право на глас од Охридска банка АД Охрид.Согласно законските прописи, Француската групација Сосиете Женерал (Société Générale, SA) ја извести Комисијата за хартии од вредност дека понудата за откуп на 322.549 обични акции ја прифатиле вкупно 297 иматели на обични акции кои доставиле изјави за вкупно 166.022 обични акции издадени од Охридска банка АД Охрид и дека понудата за откуп е успешно реализирана. Откупот на хартиите од вредност се изврши по цена од 8.157,96 денари по акција.

Усогласување со Законот за хартии од вредност

Брокерската куќа Еуроброкер и Дирекцијата за работа со хартии од вредност на Охридска банка добија дозвола за работа од Комисијата за хартии од вредност. Тоа значи дека овие овластени учесници на пазарот на хартии од вредност го усогласиле работењето со новиот Закон за хартии од вредност.

Согласности за субјектите кои се предмет на супервизија на КХВ

Комисијата за хартии од вредност даде согласност на изменетите процедури за тргување на Македонската Берза. Со нив, се воведува тргување врз основа на таканаречена базна цена, што се смета за основа над или под која ценовните флуктуации нема да можат да бидат поголеми или помали од десет отсто. Лимитот од десет отсто за зголемување или намалување на цените на акциите и досега беше присутен во тргувањето на Берзата, но тој се однесуваше на постигнатата цена во текот на минатиот берзански ден. Новината која се воведува е што предвид се зема и дали претходниот ден е истргувана т.н. "минимална прифатлива количина хартии од вредност", која, пак, зависи и од просечната дневна количина на истргувани хартии од вредност во периодот од 20 претходни дена на тргување, вкупно издадените хартии од вредност од еден издавач и распространетоста на тие хартии од вредност во јавноста. Во иднина нема да бидат можни нагли скокови или падови на цените на акциите на акционерските друштва со истргувани пет- шест или десетина акции. Одлуката за ценовните ограничувања ќе се однесува на сите хартии од вредност, вклучувајќи ги и акциите на некотираните трговски друштва.

Регистар на акционерски друштва со посебни обврски за известување

Во април вкупно активни акционерски друштва се 143. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата. Од "Регистарот на акционерски друштва со посебни обврски за известување" потенцијалните инвеститори можат да црпат точни, целосни, навремени информации врз основа на кои можат да носат правилна, вистинска, профитабилна и издржана деловна одлука за вложување на својот капитал.

Спроведени контроли

Комисијата за хартии од вредност и во април вршеше постојана посредна и непосредна контрола на овластените учесници на пазарот на хартии од вредност. Секторот за контрола на пазарот на капитал спроведе 2 (две) редовни контроли. Предмет на контролата беше: документацијата од реализирани берзански трансакции; книгата на налози; висината на ликвидниот капитал пропишан со закон; водењето на парични средства на посебна сметка на клиентите; ревидираните и поништени трансакции во изминатиот период; придржување кон налозите на клиентите и кон правилата на берзанското работење и брокерската етика и.т.н. Исто така, Секторот за контрола на пазарот на капитал изврши 2 (две) вонредни контроли.

Aктивности по барања на акционери за заштита на правата

Во април Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ во април доставени се 7 (седум) барања за заштита на акционерски права. Некои од акционерите бараат проверка на сметката во Централниот депозитар за хартии од вредност, други се жалат на повреда на берзанските процедури на тргување. Дел од поплаките пак, се однесуваат на несогласување со бројот на акции во електронскиот запис во книгите на акции во Централниот депозитар АД.

Обуки

Во текот на април се одржа II модул од Првата обука за инвестициски советници. За подрачјето "Финансиски деривативи" Комисијата за хартии од вредност ангажираше странски експерт . Станува збор за францускиот стручњак г-динот Mark Sinsheimer. Овој врвен аналитичар работел и на проекти од Европската Комисија. Присуството на г-динот Mark Sinsheimer во Скопје, Претседателот на КХВ, Проф.Д-р Весна Пендовска го искористи за размена на мислења околу финансиските деривати како нови инструменти на пазарот на хартии од вредност.Иако се предвидени со Законот за хартии од вредност , деривативните финансиски инструменти се уште не егзистираат на македонскиот пазар на капитал.