Подзаконски акти

Во март, Комисијата за хартии од вредност на Република Македонија по завршена јавна расправа го разгледа и усвои Правилникoт за изменување и дополнување на Правилникот за дополнителните информации кои треба да ги содржи барањето за издавање на дозвола за работење на брокерска куќа.

Решенија за емисии на акции

Комисијата за хартии од вредност на Република Македонија на "Албсиг"АД Скопје му даде одобрение да издаде трета емисија на акции по пат на приватна понуда. Станува збор за 50.000 обични акции во вкупна вредност од 500.000 евра. Третата емисија е наменета за познат купувач- единствениот акционер Алб –Сигурацион АД Тирана.Со третата емисија на акции, "Албсиг"АД Скопје врши зголемување на основната главнина со трансформирање на заем, даден од страна на единствениот акционер на друштвото во нови влогови, во согласност со законската регулатива.

Регистар на акционерски друштва со посебни обврски за известување

Во март, вкупно активни акционерски друштва беа 14. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Супервизорски активности

Комисијата за хартии од вредност на Република Македонија им даде согласност на Комерцијална банка АД Скопје , НЛБ Тутунска банка АД Скопје, Стопанска банка АД Скопје и Еуростандард Банка" АД Скопје, сите четири овластени банки за вршење на услуги со хартии од вредност, како и на брокерските куќи "Илирика Инвестментс" АД Скопје и "Еурохаус" АД Скопје да ја прошират дозволата за работење со хартии од вредност со нова услуга. Тие ќе можат да вршат прием и пренос на налози за купување и за продавање хартии од вредност на странски пазари, со што ќе можат да се приклучат на регионалната платформа за тргување со хартии од вредност котирани на Бугарската, Загрепската и на Македонската берза.

Дозволи за инвестициски советници

КХВ издаде три дозволи за инвестициски советник и тоа на Сашо Дракуловски, Васко Митев и на Ѓорѓи Палевски. Исто така, Комисијата му ја обнови дозволата за работење на инвестициски советник на Ристо Биткоски.

Дозволи за брокери

Во март, КХВ обнови четири дозволи за работење на брокер и тоа на Виолета Симјановска, Антонио Панев, Елена Јакимовска Петровска и на Драган Анастасовски.

Активности по барања на акционери за заштита на нивните права

Секторот за супервизија на пазарот на капитал постапуваше по едно барање за заштита на акционерско право.