Решенија за емисија на хартии од вредност

Комисијата за хартии од вредност на Земјоделското трговско друштво ‚‚Сточарство" АД - Богданци му одобри продажба на сопствени акции по пат на приватна понуда. Станува збор за 308 обични акции со продажна цена од 3.100 денари по акција, односно вкупна продажна вредност од 954.800 денари. Продажната цена е еднаква на номиналната вредност на акциите. Номиналниот износ на сопствените акции кои се предмет на понудата за продажба претставува 4,34% од основната главнина на ЗДТ ,,Сточарство" АД - Богданци.

Преземања на Акционерски друштва

Француската групација Societe Generale SA ,Париз на 16 март доби дозвола од Комисијата за хартии од вредност за давање понуда за откуп на обичните акции издадени од Охридска банка АД Охрид. Понудата за откуп на акции е упатена до сите иматели на обични акции од Охридска банка АД Охрид. Понудата се однесува на 322.549 обични акции издадени од Охридска банка АД Охрид, а ќе се смета за успешна, доколку Societe Generale SA откупи најмалку 51 % од вкупниот акционерски капитал на Охридска банка АД Охрид, односно 164.500 обични акции. Понудувачот се обврза да ги откупи хартиите од вредност по цена од 8.157,96 денари по акција. Одлуката за издавање дозвола на Societe Generale SA беше донесена едногласно.

Спроведени контроли

Комисијата за хартии од вредност изврши 1 (една) редовна контрола над овластен учесник на пазарот на хартии од вредност. Предмет на контролата беше: документацијата од реализирани берзански трансакции; книгата на налози; висината на ликвидниот капитал пропишан со закон; водењето на парични средства на посебна сметка на клиентите; ревидираните и поништени трансакции во изминатиот период; придржување кон налозите на клиентите и кон правилата на берзанското работење и брокерската етика и.т.н. Исто така, Секторот за контрола на пазарот на капитал спроведе 1 (една) вонредна контрола над брокерска куќа.

Aктивности по барања на акционери за заштита на правата

До КХВ доставени се 12 (дванаесет) барања за заштита на акционерски права. Некои од акционерите се жалат на повреда на берзанските процедури на тргување и бараат проверка на трансакции реализирани на Македонската берза АД. Дел од поплаките пак, се однесуваат на несогласување со бројот на акции во електронскиот запис во книгите на акции во Централниот депозитар АД.

Обуки

Претседателот на Комисијата за хартии од вредност на РМ Проф.Д-р Весна Пендовска на 30 март 2007 на 69 лица им врачи уверенија за положен брокерски испит. Станува збор за група кандидати кои ги посетуваа обуките што Комисијата ги спроведе во периодите јануари/февруари и октомври/ноември 2006 година. Честитајќи им за завршената обука и за вложениот труд, Проф.Д-р Весна Пендовска ги повика идните брокери на фер работа и на професионален однос со клиентите. Ги предупреди дека токму тие заедно со инвестиционите советници кои ја следат Првата обука треба да им помагаат на потенцијалните инвеститори при носењето правилна, вистинска и профитабилна одлука за вложување на својот капитал, што позитивно ќе влијае врз целокупната економија во државата.

Семинари и конференции

Претставници на Комисијата за хартии од вредност учествуваа на осмата годишна конференција што се одржа во периодот од 29-31 март во Охрид, а ја организираше Македонската берза АД Скопје. На овој форум на кој беше собрана балканската брокерска и берзанска елита се дискутираше за состојбите, проблемите, идеите и решенијата на клучните прашања актуелни за македонскиот финансиски пазар, а особено за индустријата на хартии од вредност. Дводневната конференција беше исклучителна можност на едно место да се соочат ставовите на финансиските посредници, на инвеститорите, на котираните компании , на регулаторите и на организаторите на пазарот на хартии од вредност.

Дозволи за работа на брокер

Во текот на месецот, Комисијата за хартии од вредност позитивно одлучи по 3 (три) барања за давање дозвола за работа на брокер.

Согласности за субјектите кои се предмет на супервизија на КХВ

Комисијата за хартии од вредност даде согласност Зоран Мајнов да биде именуван за директор на брокерската куќа Еуро Брокер АД Скопје.

Регистар на акционерски друштва со посебни обврски за известување

Во март вкупно активни акционерски друштва се 152.