Извештај на Комисијата за хартии од вредност на Република Македонија ( КХВ на РМ) за април 2017 година
01.05.2017

Регистар на акционерски друштва со посебни обврски за известување

​    Во април , вкупно активни акционерски друштва беа 11. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Преземање на акционерски друштва

  Комисијата за хартии од вредност на Република Македонија на лицето Илија Филиповски му издаде дозвола да даде понуда за преземање на "Технокомерц" АД Скопје. Понудата за преземање се однесува на 14.504 обични акции со право на глас издадени од "Технокомерц" АД Скопје, кои претставуваат  65,93 проценти од основната главнина на друштвото.

Преземањето на хартиите од вредност се врши по цена од 1.000 денари по акција.

Преземачот Илија Филиповски не утврдил најмала количина на обични акции на кои се однесува понудата за преземање која треба да биде прифатена за понудата за преземање да се смета за успешна.

Понудата за преземање ја дава "Комерцијална банка" АД Скопје , Дирекцијата за вршење услуги со хартии од вредност во име и за сметка на лицето Илија Филиповски.

Преземачот е постојан акционер во "Технокомерц" АД Скопје, кој поседува 7.496 акции. 

Инвестициски фондови

 Комисијата за хартии од вредност на Република Македонија на Друштвото за управување со инвестициски фондови "ВФП ФОНД Менаџмент" АД Скопје му даде одобрение да ја прошири дозволата за работа со две нови услуги: Да  управува со средства за сметка на индивидуален клиент-сопственик на портфолио и да врши инвестициско советување.

 

​Согласности на директори на овластени учесници на пазарот на хартии од вредност

Комисијата за хартии од вредност на Република Македонија даде согласност Кирил Митровски да биде именуван за директор на брокерската куќа "Инвестброкер" АД Скопје. Мандатот му трае четири години и е до 16 март, 2021 година. Инаку, и досега Кирил Митровски ја вршеше оваа функција.

 


Дозволи за брокер

​Во април, Комисијата за хартии од вредност на Република Македонија му ја обнови дозволата за брокер на Иван Ортаковски .

Дозволи за инвестициски советници

​Во април, Комисијата за хартии од вредност на Република Македонија му ја обнови дозволата за инвестициски советник на Огнен Тилиќ .

Спроведени контроли

​   Во април, Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал спроведе две редовни контроли.

Активности по барања на акционери за заштита на нивните права

​Секторот за супервизија на пазарот на капитал во април постапуваше по едно барање за заштита на акционерско право.