Извештај на Комисијата за хартии од вредност на Република Македонија ( КХВ на РМ) за јуни 2017 година

04.07.2017

Регистар на акционерски друштва со посебни обврски за известување

Во јуни , вкупно активни акционерски друштва беа 11. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Решенија за емисија на акции

Комисијата и даде одобрение на ПроКредит банка АД Скопје да издаде долгорочни хартии од вредност по пат на приватна понуда - петта емисија на 600.000 обични акции во вкупна вредност од 3.000.000 евра, односно во денарска противвредност од 185.088.300 денари.

Со петтата емисија на акции, ПроКредит банка АД Скопје врши зголемување на основната главнина со трансформирање на заем во траен влог, даден од страна на единствениот акционер на Банката ПроКредит Холдинг АГ & Цо. КГаА, од Франкфурт на Мајна, Сојузна Република Германија за кој всушност се наменети акциите од оваа емисија.

Преземање на акционерски друштва

Во јуни, Комисијата за хартии од вредност на Република Македонија издаде дозвола за давање понуда за преземање на Триглав Осигурување АД Скопје од страна на Триглав ИНТ холдиншка дружба д.д. Љубљана, Република Словенија. Понудата за преземање се однесува на 16.020 обични акции со право на глас издадени од Триглав Осигурување АД Скопје, а преземањето на хартиите од вредност се врши по цена од 14.640 денари по акција.

Согласности на директори на овластени учесници на пазарот на хартии од вредност

Во јуни, Комисијата за хартии од вредност на Република Македонија даде согласност за именување на неколку директори на овластени учесници на пазарот на хартии од вредност и тоа:

-Даринка Дамјановиќ, да биде именувана за извршен директор на Централниот депозитар за хартии од вредност АД Скопје. Дамјановиќ на оваа позиција доаѓа од редот на вработените во Депозитарот и има долгогодишно искуство во работењето на Депозитарот кое започнува од самото негово основање;

- Лазе Камчев и Марјан Николовски и во наредните шест години да бидат извршни директори на Друштвото за управување со инвестициски фондови "КД Фондови" АД Скопје;

- Коста Костадиновски да продолжи да ја врши функцијата главен извршен директор на Друштвото за управување со инвестициски фондови "Илирика Фунд Менаџмент" АД Скопје, а Јован Дојчиновски извршен директор на истото друштво. И двајцата се со мандат од две години;

- Јосиф Костадиновски доби согласност до крајот на 2017 година да раководи со Одделот за работа со хартии од вредност на "ТТК" Банка АД Скопје.

Дозволи за инвестициски советници

Во јуни, КХВ на Татјана Бојковска и издаде уверение за инвестиционо советување, а на Лазе Камчев му ја обнови лиценцата за работење на инвестициски советник.

Активности по барања на акционери за заштита на нивните права

Секторот за супервизија на пазарот на капитал во април постапуваше по три барања за заштита на акционерско право.