Регистар на акционерски друштва со посебни обврски за известување

Во февруари вкупно активни акционерски друштва се 152.

Активности по барања на акционери за заштита на правата

Секторот за контрола на пазарот на капитал постапуваше по 6 (шест) барања за заштита на акционерски права.

Обуки

На 10 февруари започна Првата обука на кадри за инвестициско советување.На свеченото отворање на обуката говореа Претседателот на Комисијата за хартии од вредност Проф.Д-р Весна Пендовска, Министерот за финансии Проф.Д-р Трајко Славески и раководителот на проектот и член на КХВ Проф. Д-р Владимир Филиповски. Поради големиот интерес на кандидатите, обуката е организирана во две групи. Првата обука за инвестициски советници ја следат вкупно 123 лица.

Меѓународни активности

Во февруари, Комисијата за хартии од вредност ја достави Нацрт-Стратегијата за зајакнување на улогата и работата на КХВ до Светската банка. Овој стратешки документ е резултат на повеќемесечната соработка на КХВ со светските банкари. Во неа се идентификувани учесниците на пазарот на капитал и областите за кои постои најголема веројатност да бидат извор на прекршувања на прописите за работењето со хартии од вредност и на измами. Главната цел е - да им се застане на патот на прекршителите на законот, да се намалат можностите за ценовни манипулации и да се зајакне супервизорската улога на Комисијата.Стратегијата, особено внимание посветува на зголемување на транспарентноста и обелоденувањето на податоците од Регистарот на акционерски друштва со посебни обврски за известување. Исто така, акцент се става и на кадровската екипираност на регулаторот. Досегашната соработка на Комисијата за хартии од вредност со УСАИД, како и натамошните проекти кои нашата институција ќе ги имплементира во иднина беа тема на неформалниот разговор на Претседателот на КХВ Проф.Д-р Весна Пендовска со новиот директор на Мисијата на УСАИД (Агенција на САД за Меѓународен развој) во Македонија Патриша Рајдер. Оваа средба беше остварена на приемот што го организираше Амбасадорот на САД во Рeпублика Македонија Џилијан Миловановиќ по повод пристигнувањето на госпоѓата Патриша Рајдер. Комисијата за хартии од вредност во февруари му беше домаќин на консултатот John Moon, кој во моментов работи како Директор на Секторот за истраги во една од најголемите инвестициски банки во САД - од UBS Investment Bank. Експертот Moon и тим од КХВ развија концепт и ги утврдија основните принципи, односно предуслови за издавање, тргување, клиринг и порамнување на деривативни финансиски инструменти во РМ. Техничката помош од консултантот John Moon беше овозможена на барање од Комисијата, а во соработка со проектот на USAID за услуги во доменот на финансиските пазари - Financial Services Volunteer Corps.