На оваа веб страна се користат колачиња кои не содржат лични податоци и служат со единствена цел за подобрување на корисничкото искуство. Со Вашето присуство на веб страната се подразбира дека се согласувате за користењето на овие колачиња. За повеќе детали во однос на заштитата на личните податоци прочитајте ја Политиката за колачиња.
Në këtë faqe të internetit përdoren biskota të cilat nuk përmbajnë të dhëna personale dhe shërbejnë me qëllim të vetëm për përmirësimin e përvojës së përdoruesit. Me prezencën Tuaj në faqen e internetit nënkuptohet se pajtoheni për përdorimin e këtyre biskotave (cookies). Për më tepër holllësi në lidhje me mbrojtjen e të dhënave personale lexoni Politikën e përdorimit të biskotave (cookies).
The website uses cookies that do not contain personal data and serve for the sole purpose of improving the user experience. Your presence on the website implies that you agree to the use of these cookies. For more details about personal data protection, please read the Cookie Policy.
По јавната расправа, каде јавноста имаше можност да ги каже своите забелешки и сугестии, Комисијата за хартии од вредност во март го усвои Правилникот за содржината, начинот и роковите за поднесување на барање за изземање од обврската на акционерско друштво со посебни обврски за известување за доставување на годишен, полугодишен, тримесечен и тековен извештај на акционер и на друго заинтересирано лице. Исто така, КХВ во март ги разгледа и следните предлог-Правилници: 1. Предлог Правилникот за известување од страна на акционерско друштво со посебни обврски за известување за стекнати односно оттуѓени хартии од вредност на правни или физички лица; 2. Предлог Правилникот за определување на дополнителните податоци што се поднесуваат со барањето за дозвола за основање на берза и за постапката на донесување на одлука во врска со барањето; 3. Предлог Правилникот за определување на дополнителни услови во врска со дозволените методи за тргување со хартии од вредност; 4. Предлог Правилникот за определување на други дополнителни критериуми кои треба да ги исполни членка на берзата, а кои не се определени во ЗХВ и Правилата за членство на берзата; 5. Предлог Правилникот за начин на водење и одржување на одделни податоци за работењето на берзата; Овие Предлог-правилници одат на јавна расправа. Јавната расправа се обезбедува преку веб страницата www.sec.gov.mk на Комисијата за хартии од вредност.
Комисијата за хартии од вредност на Комерцијално Инвестициона Банка АД Куманово и даде одобрение за издавање на седма емисија на акции. Со ова, КИБ АД Куманово доби дозвола да издаде 215.000 обични акции со номинална и продажна вредност од 1.720 денари по акција, односно со вкупен износ од 369.800.000 денари. Емисијата се реализира по пат на приватна понуда. Купувач на акциите е Milestone Ehf. Iceland. Комисијата за хартии од вредност на друштвото за осигурување Сигма АД Скопје му ја одобри третата емисија на 300.000 обични акции, со вкупна вредност од 3.000.000 евра. Оваа приватна понуда е наменета за институционалниот инвеститор - Анонимно друштво за осигурување ,,Голема сигурност" АД Тирана, Република Албанија. Беше одбиено барањето на Фруктал Мак АД Скопје за давање одобрение за издавање акции од трета емисија по пат на јавна понуда, бидејќи за оваа емисија нема согласност од Фондот за пензиско и инвалидско осигурување кој е сопственик на приоритетни акции во Фруктал Мак АД Скопје.
Комисијата за хартии од вредност (КХВ) даде дозвола за основање на друштвото за управување со фондови, Мој Фонд АД Скопје. Основачи се пет физички и едно правно лице, сите од Република Македонија. Основната главнина на друштвото изнесува 100.000 евра. Предвидено е друштвото да основа и да управува со еден отворен инвестициски фонд. Ова е трето друштво за управување со фондови во земјава и со неговото основање се очекува да се зголеми конкурентноста во инвестициското работење на македонскиот пазар на хартии од вредност.
КХВ во март ги даде првите дозволи за работење на инвестициски советници. Станува збор за седум лица кои претходно ја следеа Првата обука за инвестициски советници и се стекнаа со уверение за положен стручен испит за инвестициско советување: 1. Методи Мајнов; 2. Кирил Колемишевски; 3. Милан Димитриоски; 4. Ѕвонко Станковски; 5. Бојан Цветковски; 6.Гоце Мартиноски; 7.Дарко Јованоски; Со добивањето на лиценца за работа, пазарот се здобива со нов профил на кадри, чија работа ќе се базира на експертиза, умешност за добри проценки за идното движење на пазарот и на цврсто почитување на етичките норми. Инвестициските советници се очекува на граѓаните да им помагаат при носење на одлуки за инвестирање.
Во март КХВ даде осум дозволи за работење на брокер и тоа на: 1. Елизабета Кочовска-Ицева; 2. Мирјана Наумоска; 3. Бојан Филиповски; 4. Шахине Ајдини; 5. Александар Андреев; 6. Димитар Танчев; 7. Радмила Ѓорѓиевска; 8. Ана Софијанова;
Во март вкупно активни акционерски друштва беа 141. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.
Комисијата за хартии од вредност даде согласност на измените и дополнувањата на Правилата за котација на Македонската берза АД Скопје. Со нив, освен четирите суперкотирани компании (Бетон, Инвест банка, Комерцијална банка и Топлификација) отсега, и останатите триесет и четири котирани друштва ќе мораат да објавуваат целосни консолидирани ревидирани финансиски извештаи и тоа: Ревизорско мислење, Биланс на состојба, Биланс на успех, Извештај за паричните текови, Извештај за промените во капиталот и Белешки кон финансиските извештаи. Оваа обврска друштвата се должни да ја исполнуваат во рок од 30 дена по усвојувањето од Собранието на акционери. Преку објавување на целосни консолидирани ревидирани финансиски извештаи ќе се зголеми транспарентноста, а инвеститорите ќе имаат повеќе информации за друштвата.
Комисијата за хартии од вредност издаде две согласности за директори на брокерски куќи и тоа: Васко Митев да биде директор на брокерската куќа Илирика Инвестментс АД Скопје, а Искра Костова да раководи со брокерската куќа Бро Дил АД Скопје.
Комисијата за хартии од вредност и во март секојдневно on-line во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за контрола на пазарот на капитал спроведе една редовна контрола.
а) Брокерски куќи Комисијата за хартии од вредност (КХВ), по неколку извршени контроли, изрече санкции спрема три брокерски куќи и тоа: -Решение за привремена забрана за вршење на сите услуги со хартии од вредност на брокерската куќа Иново Брокер АД Скопје за кои има добиено дозвола. Временото суспендирање на Иново Брокер АД Скопје е резултат на тргување со налози со истечен рок на важност. -Решение за Инвестброкер АД Скопје да ги отстрани утврдените неправилности и незаконитости со кое ја задолжи брокерската куќа во рок од 90 дена од денот на добивањето на решението да ја усогласи структурата на средствата на основната главнина согласно Законот за хартии од вредност; -Решение за јавна опомена на Дирекцијата за работа со хартии од вредност на ТТК банка АД Скопје, поради неправилност при водење на книгата на налози за блок трансакции.
Во март, Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ доставени се 8 (осум) барања за заштита на акционерски права. Најголем број од акционерите не се согласуваат со бројот на акции кои се водат во Централниот депозитар за хартии од вредност АД Скопје.
Во март, претставници на Комисијата за хартии од вредност одржаа серија работни состаноци со експерти од Светската банка одговорни за пазарот на хартии од вредност во врска со PDPL-3 аранжман и FINANCIAL SECTOR ASSESSMENT PROGRAM. На средбите се дискутираше за законската регулатива што ја спроведува КХВ, за дел од правилниците кои произлегуваат од Законот за девизно работење, како и за усогласеноста на регулативата со принципите на IOSCO. Претставниците на Комисијата пред експертот му ја презентираа структурата на пазарот на хартии од вредност во Македонија, постапката за издавање нови хартии од вредност, платниот систем поврзан со клирингот и порамнувањето, како функционираат Берзата и ЦДХВ, кои се ризиците при непорамнети трансакции, како КХВ соработува со странските регулатори итн. Екпертот од Светската Банка реализираше и повеќе работни состаноци со претставници од депозитна банка, друштво за управување со инвестиционен фонд, УСАИД Проектот за деловно опкружување и др. Од страна на светскиот банкар беше оценето дека Комисијата за хартии од вредност ги исполнува условите за пристапување кон потпишување на MMOU--то на IOSCO. Во однос на имплементирањето на методологојата за супервизија базирана на ризик, беше оценето дека тоа е подолгорочен процес на кој КХВ треба да работи во иднина, користејќи слични странски искуства и решенија.