Подзаконски акти кои произлегуваат од законите во надлежност на КХВ

Комисијата за хартии од вредност во јануари го разгледа предлог -Правилникот за содржината, начинот и роковите за поднесување на барање за изземање од обврската на акционерско друштво со посебни обврски за известување за доставување на годишен, полугодишен, тримесечен и тековен извештај на акционер и на друго заинтересирано лице. Предлог-правилникот оди на јавна расправа. Јавната расправа се обезбедува преку веб страницата www.sec.gov.mk на Комисијата за хартии од вредност.

Преземања на акционерски друштва

Комисијата за хартии од вредност издаде дозвола на Централна кооперативна банка АД Софија, Република Бугарија да даде понуда за откуп на обичните акции издадени од Силекс Банка АД Скопје. Понудата за откуп на акции се однесува за 183.388 обични акции на Силекс банка. Централна кооперативна банка АД Софија се обврзува да ги откупи хартиите од вредност по цена од 4.791 денари.

Одобренија и согласности на брокерски куќи

Комисијата за хартии од вредност во јануари даде дозволи за работа на две брокерски куќи и тоа на: Пеон брокер АД Скопје и Мој Брокер АД Скопје. -Пеон брокер АД Скопје е регистрирана со основна главнина од 76.022,75 евра во денарска противвредност, поделена на 4.650 обични акции со номинална вредност од 16,3488 евра по акција.Согласно член 94 од Законот за хартии од вредност, оваа членка на пазарот на капитал ќе купува и ќе продава хартии од вредност по налог и за сметка на клиентот, ќе дејствува како покровител при котација и ќе има можност да врши инвестициско советување. -Мој Брокер АД Скопје има основна главнина од 80.000 евра во денарска противвредност, поделена на 8.000 обични акции со номинална вредност од 10 евра по акција. Оваа брокерска куќа ќе ги врши истите дејности како и Пеон брокер АД Скопје, односно ќе купува и продава хартии од вредност по налог и за сметка на клиентот, ќе дејствува како покровител при котација и ќе врши инвестициско советување.

Дозволи за брокери

Комисијата за хартии од вредност издаде четири дозволи за работење на брокер. И тоа на: 1.Даница Гавриловиќ; 2.Горан Поповски; 3.Ирена Каневче Георгиева; и 4.Тони Костов.

Регистар на акционерски друштва со посебни обврски за известување

Во јануари вкупно активни акционерски друштва беа 141. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Супервизорски (надзорни) активности на КХВ

Комисијата за хартии од вредност издаде пет согласности за директори на брокерски куќи и на дирекции за работа со хартии од вредност и тоа: 1.Горан Марковски да биде именуван за директор на Дирекцијата за вршење услуги со хартии од вредност на Комерцијална Банка АД Скопје; 2.Ѓорѓи Палевски да биде директор на Поштел брокер АД Скопје 3. Димче Панов да раководи со Мој Брокер АД Скопје; 4.Биљана Аризанкова да биде именувана за директор на Пеон брокер АД Скопје; 5.Катерина Нонкуловска да биде именувана за директор на Дирекцијата за работa со хартии од вредност и брокерско-посреднички услуги на Стопанска Банка АД Скопје.

Спроведени контроли

Комисијата за хартии од вредност и во јануари секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за контрола на пазарот на капитал спроведе 1 (една) вонредна контрола на брокерска куќа.

Активности по барања на акционери за заштита на правата

Во јануари, Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ доставени се 10 (десет) барања за заштита на акционерски права. Некои од нив не се согласуваат со бројот на акции кои се водат во Централниот депозитар за хартии од вредност АД Скопје. Дел од акционерите пак, реагираат на фактот што друштвото во кое имаат акции одбивало да им ја достави документацијата што ја барале.

Обуки

Комисијата за хартии од вредност донесе одлука да ја организира 13-тата по ред обука на кадри за работа со хартии од вредност (брокери) за најмногу 200 кандидати. Термините и условите ќе бидат дополнително објавени. За сите заинтересирани кои сакаат да ја следат обуката, КХВ ќе објави соопштение во дневниот печат и на својата веб страна во кое ќе бидат утврдени роковите за пријавување.

Меѓународна соработка

Претседателот на Комисијата за хартии од вредност Марина Наќева-Кавракова имаше средба со странскиот консултант Klaus Schmidt-Hebbel. Со него беа заеднички разгледани можностите за развој на македонскиот пазар на капитал и воведувањето на нови финансиски инструменти. Во јануари, претставници на Комисијата за хартии од вредност на покана на Секретаријатот за европски прашања на Владата на Република Македонија учествуваа на работилници организирани во рамките на проектот ГОФРЕ-Градење на административните капацитети за ЕУ ,поддржан од Британската влада.Темите на работилниците беа: „Финансиски услуги„; и „Слободно движење на капиталот„, а беа спроведени од страна на Европскиот институт од Софија. На работилниците учествуваа членови на работните групи на НПАА, а нивната цел беше да се придонесе кон подобрување на капацитетите на националните структури за хармонизација на националното со ЕУ законодавството во оваа област и размена на искуства со Република Бугарија.