Подзаконски акти кои произлегуваат од Законот за хартии од вредност

Комисијата за хартии од вредност усвои два Правилника и тоа : -Правилник за изменување и дополнување на Правилникот за содржина на месечниот извештај за работењето на депозитар на хартии од вредност и - Правилник за изменување и дополнување на Правилникот за содржина и рокови за поднесување извештаи за работењето на берза Правилниците се од времен карактер со важење од 90 дена. Двата правилника се објавени на веб-страницата на КХВ на јавна расправа.

Решенија за емисиja на хартии од вредност

Комисијата за хартии од вредност на Клириншка куќа Клириншки интербанкарски системи АД Скопје и даде одобрение за издавање на седма емисија на акции. Со ова, КИБС АД Скопје доби дозвола да издаде 1.467 обични акции во вкупен износ од 14.670.000 денари. Емисијата е наменета за познати купувачи-акционерите на друштвото. Исто така, беше дадено одобрение на Извозна и кредитна банка АД Скопје да продава сопствени акции по пат на приватна понуда. Станува збор за 1.051 обични акции по продажна цена од 49.000 денари по акција, односно вкупната продажна вредност изнесува 51.499.000 денари.

Одобренија и согласности на инвестициски фондови

Во јуни , Комисијата даде дозвола за основање на друштво за управување со фондови Сава Инвест АД Скопје. Основачи на Сава Инвест АД Скопје се две правни лица - Позаваровалница Сава д.д.Љубљана, Република Словенија и Акционерското друштво за осигурување Сава Табак Скопје. Основната главнина на друштвото изнесува 200.000 евра. Предвидено е друштвото да основа и да управува со три отворени инвестициски фондови. Со основањето на новото друштво за управување со фондови се зголемува конкурентноста во инвестициското работење на македонскиот пазар на хартии од вредност. Сава Инвест АД Скопје e петтo друштвo за управување со фондови во Република Македонија.

Дозволи за инвестициски советници

Беше издадена една дозвола за работење на инвестициски советник. И тоа на Александар Коцаре. Дозволата за работа на лицето Александар Коцаре се дава за период од пет години од денот на издавањето.

Регистар на акционерски друштва со посебни обврски за известување

Во јуни вкупно активни акционерски друштва беа 140. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Супервизорски (надзорни) активности на КХВ

Комисијата за хартии од вредност даде согласност на Одлуката за измени и дополнувања на Правилата за тргување на Македонската берза АД Скопје.

Спроведени контроли

Комисијата за хартии од вредност и во јуни секојдневно оn-line во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за контрола на пазарот на капитал спроведе 3 (три) редовни и 2(две) вонредни контроли .

Активности по барања на акционери за заштита на правата

Во јуни, Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ доставени се 6 (шест) барања за заштита на акционерски права.

Меѓународна соработка

Во периодот од 23 го 27 јуни 2008 година, претставници на Комисијата за хартии од вредност беа во тридневна посета на Агенцијата за пазарот на хартии од вредност на Република Словенија.Тоа беше добра шанса да се добие јасен преглед за состојбата и за развојот на словенечкиот пазар на хартии од вредност и да се пренесат позитивните искуства , што пак ќе помогне при креирањето на правците за понатамошен развој на македонскиот пазар на капитал. Едукацијата на вработените во КХВ беше финансиски поддржана од страна на USAID/FSVC во Република Македонија. Во истиот период, претстваник на Комисијата за хартии од вредност учествуваше на Регионалниот семинар на хартии од вредност во Софија, организиран од Toronto Centre, а инициран и поддржан од Комисијата за финансиска супервизија на Република Бугарија, во соработка со ATTF,Global Corporate Governance Forum I International Finance Corporation и техничка помош од IOSCO. На семинарот беа потенцирани сите тековни проблеми со кои се соочуваат регулаторите на пазарот на хартии од вредност, како глобални, така и регионални.Посебен акцент беше ставен на овластувањата за супервизија според директивите на Европската унија, соработката меѓу домашните регулатори и со регулатори од други држави , како и специфичните предизвици во случај на пазарна злоупотреба и надзор над друштвата.