Решенија за емисиja на хартии од вредност

Комерцијална банка АД Скопје - Комисијата за хартии од вредност ја одобри петтата емисија на обични акции на Комерцијална банка АД Скопје по пат на јавна понуда. Со оваа емисија, Комерцијална банка АД Скопје ќе издаде 471.000 обични акции. Цената по која хартиите од вредност ќе бидат понудени е 6.515,00 денари по акција. Вкупната вредност на емисијата изнесува 3.068.565.000,00 денари. Јавната понуда ќе се смета за успешна, доколку се запишат и уплатат најмалку 60 % од понудените акции. Инсиг Македонија АД Скопје - КХВ на Друштвото за осигурување Инсиг Македонија АД Скопје му ја одобри третата емисија по пат на приватна понуда. Се работи за 1500 обични акции со вкупен износ на емисијата од 1.500.000 евра. Единствен купувач на акциите е институционалниот инвеститор Институт за осигурување АД Тирана, Република Албанија.

Преземања на акционерски друштва

Комисијата за хартии од вредност донесе решение со кое се утврдува за успешна понудата за откуп на обичните акции издадени од Инвестбанка АД Скопје дадена од Steiermarkische Banka und Sparkassen AG Грац, Република Австрија. Steiermarkische Banka und Sparkassen AG Грац, Република Австрија се стекна со 243.786 обични акции, кои обезбедуваат учество од 95,84 % од вкупниот број акции со право на глас од Инвестбанка АД Скопје. Согласно законските прописи, Австриската Steiermarkische Banka und Sparkassen AG Грац ја извести Комисијата за хартии од вредност дека понудата за откуп на 254.362 обични акции ја прифатиле вкупно 266 иматели на обични акции кои доставиле изјави за 243,786 обични акции издадени од Инвестбанка АД Скопје и дека понудата за откуп е успешно реализирана. Откупот на хартиите од вредност се изврши по цена од 9.258 денари по акција. Врз основа на известувањето за исходот од понудата за откуп и по целосно утврдување на фактичката состојба, согласно член 43 од Законот за преземање на акционерските друштва, Комисијата за хартии од вредност го донесе решението за успешност на понудата. Со оглед на фактот што Steiermarkische Banka und Sparkassen AG Грац стекна над 95 % од вкупниот број акции со право на глас од Инвестбанка АД Скопје, останатите акционери кои не ја прифатиле понудата имаат можност на австрискиот инвеститор во дополнителен рок да му ги продадат своите акции. Исто така, и Steiermarkische Banka und Sparkassen AG Грац има право да побара од акционерите да им ги откупи акциите, за да поседува 100 % од капиталот на Инвестбанка АД Скопје.

Одобренија и согласности на инвестициски фондови

Комисијата за хартии од вредност даде одобрение за основање на нови пет инвестициски фондови од отворен тип во кои можат да инвестираат сите граѓани и компании.Станува збор за: - Мој Фонд - го основа Друштвото за управување со фондови Мој Фонд АД Скопје; - Сава инвест растечки фонд акции и Сава инвест балансирачки фонд - ги основа Друштвото за управување со фондови Сава Инвест АД Скопје; - КД Брик и КД Јужен Балкан - ги основа Друштвото за управување со фондови КД Фондови АД Скопје. Овие отворени инвестициски фондови ќе прибираат парични средства преку јавен повик за продажба на документи за удел во фондовите и истите ќе ги вложуваат во согласност со Законот за инвестициски фондови, Статутот и Проспектот на фондот. Согласно податоците на Проспектите на фондовите, средствата ќе се инвестираат во: 1.Мој Фонд-претежно во акции на компании и банки кои работат на територијата на Македонија, Србија, Хрватска, БИХ, Бугарија, Словенија и Турција, а ќе инвестира и во земји од ЕУ, Руска Федерација, САД, Кина, Австралија и.т.н. 2.Сава инвест растечки фонд акции- главно во акции на издавачи од Македонија, БИХ, Хрватска, Црна Гора, Србија и Албанија, но и во земјите од ЕУ и ОЕЦД. 3.Сава инвест балансирачки фонд - во различни инструменти на пазарите во Македонија, БИХ, Хрватска, Црна Гора, Србија и Албанија, како и во земјите од ЕУ и ОЕЦД. 4.КД Брик-во хартии од вредност на компании и финансиски институции од земјите на БРИК (Бразил,Русија,Индија и Кина), растечките, развиените и балканските земји. 5.КД Јужен Балкан-претежно во акции на пазарите на хартии од вредност во Македонија, Албанија, Турција, БИХ, Молдавија, Бугарија, Грција, Србија, Црна Гора и Романија.

Дозволи за брокери

Во септември беа издадени пет дозволи за брокери. И тоа на: 1.Елена Србиновска; 2.Михајло Ивковски; 3.Бранко Марсениќ; 4.Билјана Митревска; 5.Билјана Станковска - Арсова;

Дозволи за инвестициски советници

КХВ на Васко Митев му издаде дозвола за работење како инвестициски советник.

Регистар на акционерски друштва со посебни обврски за известување

Во септември, вкупно активни акционерски друштва се 141. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Супервизорски (надзорни) активности на КХВ

Комисијата за хартии од вредност даде согласност на измените и дополнувањата на Тарифата на Централниот депозитар за хартии од вредност АД Скопје, со кој дополнително се намалуваат надоместоците што ги наплатува ЦДХВ за порамнување на склучените трансакции, односно наместо 0,125% по трансакција од 1 октомври Депозитарот наплатува 0,1 % по трансакција.

Спроведени контроли

Комисијата за хартии од вредност и во септември секојдневно оn-line во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за контрола на пазарот на капитал спроведе 2 ( две ) редовни и 4 (четири) вонредни контроли.

Санкции

а) Брокерски куќи КХВ санкционираше две брокерски куќи и тоа: - "Иново Брокер" АД Скопје- КХВ ја задолжи брокерската куќа да ја усогласи структурата на средствата на основната главнина на друштвото.Исто така , КХВ глоба до 5000 евра за "Иново Брокер" АД Скопје и до 2000 евра за директорот на брокерската куќа. - "Публикум" АД Скопје- КХВ ја задолжи брокерската куќа да ја усогласи структурата на средствата на основната главнина на друштвото.Исто така , КХВ глоба до 5000 евра за "Публикум" АД Скопје и до 2000 евра за директорот на брокерската куќа.

Активности по барања на акционери за заштита на правата

Во септември , Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ доставени се 6 ( шест) барања за заштита на акционерски права.

Meѓународна соработка

Во текот на септември, претставници на Комисијата за хартии од вредност учествуваа на следниве настани: 1) конференција во организација на Комисијата за хартии од вредност на Република Србија на 11 септември 2008 година; 2) дводневна работилница во организација на УСАИД-Проект за деловно опкружување во периодот од 18-20 септември 2008 година; 3) семинар за MiFID Implementation in practice: CEE&SEE кој се одржа од 24-27 септември 2008 година; 4) семинар во организација на IOSCO на тема "Market and liquidity risk", кој се одржа од 29 септември до 03 октомври 2008 година во Мадрид , Шпанија; 5) семинар во организација на Советот на Европа - Комитетот за евалуација на мерките за спречување на перење пари и финансирање на тероризам, што се одржа од 30 септември до 04 октомври 2008 година.