Подзаконски акти кои произлегуваат од законите во надлежност на КХВ

Комисијата за хартии од вредност го усвои Правилникот за пресметување на нето вредноста на имотот на инвестициониот фонд и за пресметување на нето вредноста на имотот по удел или акција на инвестицониот фонд.

Решенија за емисија на хартии од вредност

Комисијата за хартии од вредност на Акционерското друштво за осигурување Сава Табак-Скопје му ја одобри четвртата емисија на акции. Станува збор за 460 обични акции во износ од 230.000 евра. Емисијата се реализира како приватна понуда и е наменета за постојните акционери од компанијата.

Преземања на акционерски друштва

Во ноември,Комисијата за хартии од вредност утврди дека понудата на МЕГА ЕЛ ЕООД, Софија, Р. Бугарија за откуп на акциите на АД Фабрика за кабли Неготино е успешна, односно дека на јавниот повик за преземање на фабриката се јавиле 204 акционери кои понудиле 25.377 акции што претставува 14,9% од вкупниот број акции издадени од друштвото.

Дозволи за брокери

Комисијата за хартии од вредност издаде пет дозволи за работење на брокер. И тоа на: 1. Михајло Брова Зиков 2.Златко Кузмановски 3. Билјана Аризанкова 4.Ана Кралева 5.Александар Богиќевиќ

Супервизорски (надзорни) активности на КХВ

Комисијата за хартии од вредност на актуелниот директор на ЦДХВ Стеван Шапчески му го продолжи мандатот за дополнителни четири години. Исто така , во ноември Панче Шурков доби согласност да биде директор на брокерската куќа Бета брокер АД Скопје, а Игор Размовски да раководи со Одделот за работа со хартии од вредност на Охридска банка АД Охрид.

Согласности за субјектите кои се предмет на супервизија на КХВ

Комисијата за хартии од вредност даде согласност на измените и дополнувањата на Статутот на Централниот депозитар на хартии од вредност со кои наместо досегашниот двостепен систем (Управен и Надзорен одбор) се воведува едностепен (Одбор на директори).

Регистар на акционерски друштва со посебни обврски за известување

Во ноември вкупно активни акционерски друштва беа 144. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Спроведени контроли

Комисијата за хартии од вредност и во ноември секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за контрола на пазарот на капитал спроведе 1 (една ) редовна контрола . Предмет на контролата беше: документацијата од реализирани берзански трансакции; книгата на налози; висината на ликвидниот капитал пропишан со закон; водењето на парични средства на посебна сметка на клиентите; ревидираните и поништени трансакции во изминатиот период; придржување кон налозите на клиентите и кон правилата на берзанското работење и брокерската етика и.т.н. Исто така, беа извршени и 3 (три) вонредни контроли.

Санкции

а) Брокерски куќи Комисијата за хартии од вредност трајно и ја одзема дозволата за вршење на услуги со хартии од вредност на брокерската куќа Мак Брокер АД Скопје. Причина за ова е укинувањето на дозволата за основање и работење на Македонска Банка АД Скопје од страна на Народната банка на Македонија, која е и единствен основач на Мак Брокер. Решението за одземање на дозволата на Мак Брокер стапи на сила од 28 ноември 2007. б) Акционерски друштва По истрагата што ја спроведе Комисијата за хартии од вредност, а во која беше утврдено дека котираната компанија АДГ Маврово Скопје не ги почитувала обврските што ги има како друштво со посебни обврски за известување, а членовите на органите на управување тргувале врз основа на инсајдерски информации, во ноември беа изречени неколку мерки: - Времено, за период од 30 работни дена, го прекина тргувањето со акциите на АДГ Маврово Скопје и забрани вршење на нетрговски преноси со акциите. Оваа санкција стапи на сила од 5.12.2007 година, по истекот на изречената мерка од страна на Македонска берза за времено прекинување на тргувањето со акциите на АДГ Маврово Скопје; - Ќе се поведе прекршочна постапка пред надлежниот суд против АДГ Маврово Скопје, бидејќи друштвото не ги исполнило обврските од Законот за хартии од вредност за доставување на годишен, полугодишен и тримесечен финансиски извештај, како и на тековни соопштенија и материјали за акционерски собранија; - Заради недоставување на првичен извештај за сопственост, ниту извештај за промена на сопственост, согласно Законот за хартии од вредност, Комисијата за хартии од вредност ќе поведе прекршочна постапка пред надлежниот суд против членовите на органите на управување на АДГ Маврово Скопје; - Комисијата за хартии од вредност констатира дека членовите на органите на управување на АДГ Маврово Скопје поседувале ценовно чувствителни информации кои навремено не ги објавиле и не ги направиле достапни до целокупната инвеститорска јавност, а притоа своите акции ги продавале. Затоа, Комисијата за хартии од вредност поднесе иницијатива до надлежните институции за поведување постапка против членовите на органите на управување на АДГ Маврово Скопје заради злоупотреба на службената положба и овластувањата при тргување со хартии од вредност врз основа на инсајдерски информации. Комисијата за хартии од вредност за случајот со АДГ Маврово Скопје достави информација до Јавното обвинителство, Министерството за внатрешни работи и до Управата за јавни приходи.

Активности по барања на акционери за заштита на правата

Во ноември, Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ доставени се 11(единаесет) барања за заштита на акционерски права. Некои се жалат на повреда на берзанските процедури на тргување и бараат проверка на трансакции реализирани на Македонската берза АД. Други пак, не се согласуваат со бројот на акции кои се водат во Централниот депозитар за хартии од вредност АД Скопје.

Меѓународна соработка

Во ноември во Комисијата за хартии од вредност престојуваше Erik T.Huitfeldt кој како странски експерт треба да помогне во изготвување на методологија преку која ќе се обезбеди современ пристап на контрола базиран врз ризикот (risk-based approach) на ваков начин ќе се подобри квалитетот на супервизијата. Меѓународниот консултант е ангажиран во соработка со Светската банка преку донација од Кралството Холандија.