Решенија за емисии на акции

Комисијата за хартии од вредност на Република Македонија во јули ја одобри петтата емисија на акции на АД за осигурување Сава Табак - Скопје по пат на приватна понуда. Станува збор за 5000 обични акции со продажна цена од 500 евра по акција и вкупен износ на емисијата од 2.500.000 евра. Петтата емисија на акции на друштвото се врши со нови влогови и е наменета за институционалниот инвеститор - постојан акционер Позаваровалница САВА Д.Д. Љубљана, Република Словенија. Зголемувањето на основната главнина, Сава Табак Осигурување АД Скопје го врши заради подобрување на финансиското работење и зајакнување на позицијата на друштвото на осигурителниот пазар.

Регистар на акционерски друштва со посебни обврски за известување

Во јули, вкупно активни акционерски друштва се 154. Како што е познато, во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Супервизорски активности

Комисијата за хартии од вредност на РМ во јули донесе Решение со кое Илирика ДЗУ д.о.о. Љубљана доби согласност да стекне квалификувано учество во друштвото за управување со инвестициски фондови Илирика Фунд Менаџмент АД Скопје. Добивањето согласност за квалификувано учество е чекор на друштвото за управување со инвестициски фондови Илирика Фунд Менаџмент АД Скопје за отпочнување на постапка за докапитализација, односно за зголемување на основната главнина.

Меѓународна соработка

Претседателот на Комисијата за хартии од вредност на Република Македонија Марина Наќева Кавракова во периодот од 7 до 10 јули 2011 година престојуваше во Белград, Република Србија. Претседателот на КХВ оствари серија работни состаноци со колегите од Српскиот регулатор за состојбите на пазарите на капитал во двете земји,како и за одредени трансакции.