Решенија за емисии на акции

Комисијата за хартии од вредност на Република Македонија на Халк Банка АД Скопје и ја одобри десеттата емисија на акции по пат на приватна понуда. Се издаваат нови 146.545 обични акции, со вкупен износ од 1.465.450.000 денари. Десеттата емисија се врши со нови влогови и е наменета за институционалниот инвеститор - постојан акционер Халк Банка А.Ш. Турција од Анкара-Турција. Зголемувањето на основната главнина на Халк Банка АД Скопје е за да се обезбеди оптимална адекватност на капиталот во наредниот период. Друштвото за управување со инвестициски фондови Илирика Фунд Менаџмент АД Скопје доби одобрение да емитува 20.000 обични акции во вкупен износ од 200.000 евра. Третата емисија на акции се врши со нови влогови и е наменета за институционалниот инвеститор и постојан акционер на друштвото - Илирика ДЗУ д.о.о Љубљана, Република Словенија. Докапитализацијата се прави заради покривање на неопходните трошоци во работењето и адекватност на капиталот. Комисијата на Друштвото за застапување во осигурувањето - АМГ Премиум АД Скопје му даде одобрение да издаде 35.000 обични акции со вкупен износ од 35.000 евра. Втората емисија се реализира по пат на приватна понуда и е наменета за познат купувач, а се врши заради исполнување на условот за пререгистрација на Друштвото за застапување во осигурувањето во Брокерско друштво за осигурување.

Решенија за преземање на акционерски друштва

КХВ донесе Решение со кое се утврдува за успешна понудата за откуп на акции издадени од Друштвото за производство на хартија и амбалажа Комуна АД Скопје, дадена од Дуропак ГмбХ Виена, Австрија. Со ова, Скопска Комуна и формално правно е преземена од австрискиот инвеститор, кој се има стекнато со 179.182 обични акции, кои обезбедуваат учество од 68,8 проценти од акциите со право на глас издадени од Комуна АД Скопје.

Регистар на акционерски друштва со посебни обврски за известување

Во август, вкупно активни акционерски друштва се 154. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Согласности за директори на овластени учесници на пазарот на хартии од вредност

Комисијата даде согласност Јосиф Костандиновски да биде именуван за директор на брокерската куќа Еуро Брокер АД Скопје за мандат од четири години, а Атанас Стојчески за директор на Одделот за работа со хартии од вредност на Охридска банка АД Охрид за период од една година.

Дозволи за брокери

Комисијата за хартии од вредност на РМ на Елена Рогановиќ Манчева и издаде лиценца за брокер, а на Игор Размоски му ја обнови дозволата за работење како брокер.

Супервизорски активности

КХВ и даде согласност на Стопанска банка АД Скопје - Дирекција за работа со хартии од вредност и брокерско посреднички услуги, да ја прошири дозволата за работење со хартии од вредност за вршење на уште две нови услуги и тоа: управување со портфолио на хартии од вредност по налог и за сметка на индивидуален клиент и инвестициско советување. Со ова, Стопанска банка АД Скопје - Дирекција за работа со хартии од вредност и брокерско посреднички услуги може да ги врши сите услуги со хартии од вредност, утврдени со Законот за хартии од вредност и за тоа во секое време мора да поседува и да одржува основна главнина во износ од 500 илјади евра.

Санкции

А) Брокери Комисијата изрече јавна опомена на брокер, вработен во брокерската куќа Иново брокер АД Скопје поради непочитување на Законот за хартии од вредност и на Правилата за тргување на Македонската берза АД Скопје, односно брокерот не се придржувал кон инструкциите дадени од клиентот.