Подзаконски акти

Комисијата за хартии од вредност во ноември го разгледа и усвои Правилникот за измена и дополнување на Правилникот за начинот и условите за обука и полагање на посебен стручен испит за инвестиционо советување. Овој подзаконски акт претходно беше ставен на јавна расправа. Исто така, КХВ го усвои и Предлог Правилник за иземенување и дополнување на Правилникот за формата и содржината на барањето за одобрување на приватна понуда на хартии од вредност, по што е објавен на веб страницата на Комисијата за јавна расправа. Јавноста ќе има можност да ги каже и своите забелешки и сугестии о за Правилникот за формата и содржината на образецот на барањето за донесување одлука во случај на молчење на Комисијата, кој е усвоен како подзаконски акт од времен карактер.

Решенија за емисии на акции

Комисијата за хартии од вредност на Република Македонија на Шпаркасе Банка Македонија АД Скопје и одобри да ја издаде осумнаесетта емисија на акции по пат на приватна понуда. Станува збор за 184.200 обични акции со поединечна продажна цена од 5.000 денари по акција. Купувач на акциите е Steiermarkishe Bank und Sparkassen AG од Грац, Австрија, кој е институционален инвеститор и постојан акционер во банката. Целта за издавање на акциите по пат на приватна понуда е прибирање на акционерски капитал кој ќе може да се пласира во долгорочни инвестициски и станбени кредити.

Преземање на акционерски друштва со посебни обврски за известување

КХВ во ноември донесе Решение за утврдување на успешност на понудата за откуп на акции издадени од Акционерското друштво Тајмиште производство, преработка, промет и услуги, Кичево.

Регистар на акционерски друштва со посебни обврски за известување

Во ноември, вкупно активни акционерски друштва се 152. Како што е познато, во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Дозволи за брокери

Комисијата за хартии од вредност на Република Македонија во ноември обнови две брокерски дозволи и тоа на Леонид Дечев и на Гордана Богеска.

Дозволи за инвестициски советници

КХВ издаде една лиценца за инвестициски советник и тоа на Дарко Сима.

Спроведени контроли

Секторот за супервизија на пазарот на капитал во ноември спроведе три вонредни контроли и две редовни контроли на овластени учесници на пазарот на хартии од вредност.

Супервизорски активности

Комисијата за хартии од вредност на РМ даде согласност на Одлуката за измени и дополнувања на Правилата за работа на Централниот депозитар за хартии од вредност АД Скопје. Со овие корекции се овозможува овластен учесник да може да отвори портфолио сметка за хартии од вредност на име на друштво за управување со инвестициски фондови или на друштво за инвестициско советување кое има дозвола за управување со портфолио на хартии од вредност, издадена од Комисијата.

Согласности на директори на овластени учесници на пазарот на хартии од вредност

Комисијата за хартии од вредност на Република Македонија даде согласност Даринка Дамјановиќ да биде именувана за вршител на должност - директор на Централниот депозитар за хартии од вредност АД Скопје. Функцијата вршител на должност ќе може да ја врши шест месеци. Именувањето на Даринка Дамјановиќ за вршител на должност - директор на Централниот депозитар за хартии од вредност АД Скопје доаѓа откако Комисијата за хартии од вредност на Република Македонија во октомври едногласно донесе решение со кое не даде согласност Стеван Шапчески да биде повторно именуван за директор на Централниот депозитар за хартии од вредност АД Скопје. Даринка Дамјановиќ во моментов е Раководител на правен сектор во Централниот депозитар за хартии од вредност АД Скопје.

Барања за заштита на акционерски права

До Секторот за супервизија на пазарот на капитал во ноември стигнаа 3 поплаки од акционери за заштита на нивните права.

Санкции

КХВ на Агромеханика АД Скопје и изрече мерка - јавно обелоденување на утврдената неправилност и незаконитост. Имено, Агромеханика АД Скопје поседувала ценовна чувствителна информација во врска со судски спор и како друштво со посебни обврски за известување била должна да ја објави истата , но тоа не го сторила. Ваквата мерка е резултат на серија спроведени контроли од страна на Комисијата, заради заштита на правата на малцинските акционери на Агромеханика АД Скопје. Комисијата за хартии од вредност на Република Македонија донесе решение со кое на правното лице БРИК АД Берово и на Татјана Чичаковска им го одзема правото на глас и правото на дивиденда на обичните акции што ги поседуваат во Алкалоид АД Берово, а што како поврзани лица ги стекнале спротивно на Законот за преземање на акционерски друштва. Затоа, Комисијата ги задолжи лицата кои се стекнале со акции спротивно на одредбите на законот, истите да ги понудат за продажба во рок кој не може да биде подолг од 90 дена.

Обуки

Со корпоративно управување до зголемена вредност на компаниите е насловот на работилницата што на 24 ноември 2011 година во Скопје ја организираа Комисијата за хартии од вредност и Меѓународната финансиска корпорација (ИФЦ), дел од Групацијата на Светска банка. Работилницата имаше за цел да им помогне на компаниите во Македонија, пред се на друштвата со посебни обврски за известување, преку подобрување на корпоративното управување да станат посакуван партнер на финансиските институции и на инвеститорите.

Меѓународна соработка

Претседателот на Комисијата за хартии од вредност на Република Македонија Марина Наќева Кавракова на 30 ноември, 2011 година во Белград, Република Србија ја потпиша Декларацијата за соработка на регулаторите на пазарите на капитал во регионот. Освен Претседателот на Македонската Комисија за хартии од вредност, потпис на документот ставија и претставници на регулаторите на Република Словенија, Република Србија, Република Српска,Федерација БиХ, Брчко дистрикт БиХ, Република Црна Гора и на Република Хрватска. Целта на декларацијата е да се зајакнатинтегритетот и ефикасноста на пазарите на хартии од вредност и заштитата на инвеститорите. Декларацијатаважи пет години.