Подзаконски акти

По завршена јавна расправа , Комисијата за хартии од вредност на Република Македонија во декември усвои два Правилника и тоа: 1.Правилник за изменување и дополнување на правилникот за критериумот за рангирање на субдепозитарна банка на инвестициски фонд и 2. Правилник за изменување и дополнување на Правилникот за формата и содржината на барањето за одобрување на приватна понуда на хартии од вредност.

Решенија за емисии на акции

Комисијата за хартии од вредност на Република Македонија на Друштвото за трговија и услуги "Тобако" АД Скопје му одобри емисија на акции по пат на јавна понуда. Предмет на понудата се 200 илјади обични акции, со минимална продажна цена од 617 денари по акција. Доколку, оваа јавна емисија биде успешна, Друштвото за трговија и услуги "Тобако" АД Скопје ќе го исполни условот да биде запишано во Регистарот на Комисијата за хартии од вредност на друштва со посебни обврски за известување.

Регистар на акционерски друштва со посебни обврски за известување

Во декември, вкупно активни акционерски друштва се 154. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Дозволи за брокери

КХВ во декември му ја обнови дозволата за брокер на Степан Стефановски.

Дозволи за инвестициски советници

Во декември, КХВ им издаде уверенија за инвестициско советување на Петар Велкаврх и на Јанко Тренковски.

Постапка за ликвидација

Комисијата за хартии од вредност на Република Македонија трајно и ја одзема дозволата за вршење на услуги со хартии од вредност на брокерската куќа "Ауктор и Хита Брокери" АД Скопје , поради донесена одлука за престанок со работа на брокерската куќа од страна на Собранието на акционери. Истовремено, со трајното одземање на дозволата за работа на "Ауктор и Хита Брокери" АД Скопје се исполнуваат условите за отворање на ликвидација на брокерската куќа, за што Комисијата за хартии од вредност на Република Македонија ќе поведе постапка пред надлежниот суд.

Санкции

A ) Акционерски друштва со посебни обврски за известување Комисијата за хартии од вредност на РМ одби да ја ослободи "Стопанска банка" АД Битола од обврската за обелоденување на ценовно чувствителна информација во врска со поведена судска постапка,чија висина изнесува повеќе од 5 % од вредноста на капиталот на банката. Во барањето до КХВ, "Стопанска банка " АД Битола објаснува дека јавното објавување на информација та би влијаело лошо на репутацијата на банката и врз инвеститорската јавност и пазарот на хартии од вредност. Комисијата како институција која се грижи за транспарентност на пазарот на хартии од вредност оцени дека објавувањето на ценовно чувствителната информација е во интерес на инвеститорите и е битна за донесување на правилна инвестициска одлука и затоа го одби барањето на "Стопанска банка" АД Битола.

Меѓународна соработка

Претставник на Комисијата за хартии од вредност на Република Македонија учествуваше на Годишната Конференција на Европскиот Регионален Комитет на Меѓународната организација на Комисиите за хартии од вредност -IOSCO што се одржа на 15 декември 2011 година во Брисел, Белгија.