Решенија за емисија на хартии од вредност

Комисијата за хартии од вредност на РМ му даде одобрение на Макошпед Осигурување АД Скопје за издавање на трета емисија на акции наменета за постојните акционери на друштвото по основ на распределба на нераспределената добивка на друштвото. Со оваа емисија на акции друштвото издава 1 025 акции во вкупна вредност од 524.072,25 евра. Комисијата и одобри на Македонската берза АД Скопје да емитира акции од трета емисија. Станува збор за 1396 обични акции во вкупен износ од 51 845 759,50 денари. Оваа емисија е наменета за акционерите на берзата и се врши од средства на берзата по основ на исплата на дивиденда во акции. КХВ на седницата ја одобри тринаесетата емисија на акции по пат на приватна понуда на НЛБ Тутунска банка АД Скопје што ќе се реализира со паричен влог. Се работи за 91 755 обични акции во продажен износ од 734 040 000 денари.

Одобренија и согласности на инвестициски фондови

Комисијата за хартии од вредност даде дозвола за основање на второто друштво за управување со фондови во Република Македонија, Иново Статус АД Скопје. Основач на друштвото се 3 (три) правни лица и 6 (шест) физички лица, државјани на Република Бугарија. Основната главнина на друштвото изнесува 130 000 евра. Предвидено е друштвото да основа и да управува со еден отворен инвестициски фонд. Со основањето на второто друштво за управување со фондови се зголемува конкурентноста во инвестициското работење на македонскиот пазар на хартии од вредност.

Дозволи за брокери

Комисијата за хартии од вредност на Методија Динев му издаде дозвола за брокер.

Супервизорски (надзорни) активности на КХВ

Фимка Митева доби согласност да биде именувана за директор на брокерската куќа Публикум АД Скопје.

Регистар на акционерски друштва со посебни обврски за известување

Во август вкупно активни акционерски друштва се 145. Во Регистарот што го води Комисијата за хартии од вредност се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 ЕВРА во денарска противвредност и повеќе од 100 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Aктивности по барања на акционери за заштита на правата

Во август Комисијата за хартии од вредност активно ја извршуваше својата контролна функција на пазарот на хартии од вредност и согласно законските прописи решаваше индивидуални (поединечни) и групни барања на акционери за заштита на нивните права кои произлегуваат од сопственоста над акциите. До КХВ доставени се 5 (пет) барања за заштита на акционерски права. Дел од акционерите се жалат на повреда на берзанските процедури на тргување и бараат проверка на трансакции реализирани на Македонската берза АД.