Подзаконски акти

По завршена јавна расправа, Комисијата за хартии од вредност на Република Македонија во декември ги усвои следните Правилници: 1.Правилник за кадровска, техничка и организациона оспособеност за основање и работа на овластено правно лице за вршење услуги со хартии од вредност; 2. Правилник за задолжителната содржина, формата и роковите за доставување на извештаите за работењето од страна на инвестициските фондови, друштвата за управување и депозитарната банка; 3. Правилник за изменување и дополнување на Правилникот за утврдување на структурата, пресметката и начинот на одржување на средствата на минималната основна главнина на друштвото за управување со инвестициски фондови; Во декември , Комисијата за хартии од вредност на Република Македонија го усвои и Правилникот за изменување и дополнување на Правилникот за критериумот за рангирање на субдепозитарна банка на инвестициски фонд кој е од времен карактер;

Решенија за емисии на акции

Комисијата за хартии од вредност на Република Македонија на АД за изградба и стопанисување со станбен простор и со деловен простор од значење на Републиката-Скопје (ПУИГ) му одобри втора емисија по пат на приватна понуда. Станува збор за зголемување на основната главнина со влогови преку издавање на нови акции и тоа во вкупен износ од 324.502,50 евра. Се работи за 70 обични акции по цена од 4.635,75 евра за една акција.Емисијата е наменета за познат купувач-Влада на Република Македонија.

Регистар на акционерски друштва со посебни обврски за известување

Комисијата за хартии од вредност на Република Македонија во декември донесе решение со кое Акционерското друштво Фабрика за опрема и преносници МЗТ ФОП АД Скопје се брише од Регистарот на акционерски друштва со посебни обврски за известување. Со ова, во декември, вкупно активни акционерски друштва беа 18. Инаку, во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Спроведени контроли

Во декември , Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал во декември спроведе пет редовни и четири вонредни контроли.

Активности по барања на акционери за заштита на правата

Секторот за супервизија на пазарот на капитал постапуваше по едно барање за заштита на акционерско право.