Комисијата за хартии од вредност на Република Северна Македонија на 46-тата седница со која претседаваше Претседателката на КХВ М-р Нора Алити донесе решение со кое на Халк Банка АД Скопје и даде одобрение да ја издаде 21-вата емисија  на долгорочни хартии од вредност по пат на приватна понуда.  
Со дваесет и првата емисија на акции Халк Банка АД Скопје ќе издаде 123.000 обични акции со номинална и продажна вредност од 10.000  денари по акција, со вкупен износ на емисијата од 1.230.000.000  денари.
Зголемувањето на основната главнина со нови парични влогови се врши за познат купувач – институционалниот инвеститор Халк Банка А.Ш. Турција. Банката издава нови акции заради зголемување на капиталот и обезбедување на оптимална адекватност на капиталот во наредниот период.
         На седницата што се одржа денеска на 4 октомври, КХВ донесе Решение со кое на Друштвото за управување со отворени и затворени инвестициски фондови НЛБ Фондови АД Скопје му даде  одобрение за организирање на отворен инвестициски фонд НЛБ Обврзници.
Сопственици на удели во новиот фонд можат да бидат домашни и странски институционални и индивидуални инвеститори, кои сакаат да вложат средства на период до 3 години  во инструменти со фиксен доход (државни и корпоративни обврзници) и да остварат атрактивен принос. Средствата на фондот ќе бидат инвестирани во депозити во овластени банки во земјава кои достасуваат во рок кој не е подолг од една година, краткорочни и долгорочни должнички хартии од вредност, државни и корпоративни обврзници, обврзници на издавачи (80% - 100%), удели во други отворени инвестициски фондови регистрирани во Република Северна Македонија или држави  кои се членки или не се членки на ЕУ и на ОЕЦД, под услов надоместокот за управување да не надминува 1% од нето вредноста на имотот на тој фонд на годишно ниво (0% -10%)  и пари на сметка (0% - 20%). Депозитарна банка на отворениот инвестициски фонд НЛБ Обврзници е НЛБ Банка АД Скопје.

      Исто така, по спроведена јавна расправа,  Комисијата го усвои првиот пакет на Правилници кои произлегуваат од новата законска регулатива за пазарот на хартии од вредност.