Комисијата за хартии од вредност на Република Северна Македонија на 76-тата седница, со која претседаваше претседателката на КХВ м-р Бујаре  Абази, донесе Решение со кое на Сервис Петрол ДОО Скопје, му се издава дозвола за давање понуда за преземање на Фабрика Карпош АД Скопје. Понудата за преземање се однесува на 62.078 обични акции со право на глас издадени од Фабрика Карпош АД Скопје. Преземањето на хартиите од вредност ќе се врши по цена од 350 денари по акција. Во согласност со Понудата за преземање, преземачот не утврдил најмала количина обични акции на кои се однесува Понудата за преземање која треба да биде прифатена за да се смета за успешна.

Откако констатира дека се исполнети условите, КХВ на Халк Банка АД Скопје и даде согласност да извршува нова услуга со хартии од вредност: прием и пренос на налози за купување и продавање на хартии од вредност на странски пазари на хартии од вредност.

Исто така, КХВ донесе Решение со кое на Ilirika Holding d.o.o. Ljubljana Slovenija и даде согласност за стекнување на квалификувано учество во Илирика инвестментс АД Скопје, за акции чиј вкупен кумулативен износ надминува 50 % од вкупно издадените акции со право на глас. Со оваа согласност, Ilirika Holding d.o.o. Ljubljana Slovenija би стекнала 61% удел во брокерската куќа.
 
На седницата што се одржа денеска на 26.01.2026 година, Филип Петрушевски доби согласност да биде именуван  за директор на ИНВЕСТБРОКЕР АД Скопје. Според Одлуката на  Oдборот на директори на брокерската куќа, согласноста важи за период од четири години. Филип Петрушевски  и досега беше на истата позиција. 

Исто така, КХВ обнови една дозвола за работење на брокер за период од пет години.