Комисијата за хартии од вредност на Република Северна Македонија на 69-тата седница со која претседаваше Претседателката на КХВ  М-р Бујаре  Абази  донесе Решение со кое на Друштвото за управување со отворени и затворени инвестициски фондови Опфолио инвестиции му се дава одобрение за организирање на два отворени инвестициски фонда и тоа:
1.ОПФОЛИО ПРОГРЕСИВЕН ФОНД-отворен инвестициски фонд и
2.ОПФОЛИО ПАРИЧЕН ФОНД-отворен инвестициски фонд.
ОПФОЛИО ПРОГРЕСИВЕН ФОНД  првенствено е наменет за вложувачи со инвестициски хоризонт на долг рок и повисок степен на толеранција кон ризикот. Како инвеститори на Фондот може да се јават домашни и странски, правни и физички лица, а временски период кој е препорачлив за вложување во Фондот е  пет години. Согласно Проспектот, инвеститорите можат да изберат помеѓу два вида на уплати: оптималниот и инвестицискиот план.
Средствата на Фондот ќе бидат инвестирани во следните видови инструменти: акции - преносливи хартии од вредност на издавачи од земјата и странство без географски ограничувања (85% - 100%), инвестициски фондови (0% - 10%); обврзници (0% - 15%); депозити (0% - 15%)  и пари на сметка (0% - 15%).
ОПФОЛИО ПАРИЧЕН ФОНД пак  е наменет за домашни и странски, физички и правни лица, кои се карактеризираат со ниска толеранција на ризик и инвестициски хоризонт пократок од една година.  Инвестициската стратегија е дизајнирана да генерира стабилен и континуиран принос со минимална волатилност на вредноста на уделот, со што се заштитува капиталот од пазарни флуктуации.
Средствата на Фондот ќе бидат инвестирани во следните видови инструменти: инвестициски фондови (0% - 10%); вложувања во краткорочни и долгорочни должнички хартии од вредност, независно од инвестицискиот рејтинг на издавачот, чие седиште се наоѓа во земја-членка на ЕУ, ОЕЦД или на пазарите во развој. Издавачи на овие финансиски инструменти можат да бидат странски субјекти, вклучувајќи влади, централни банки, компании и финансиски институции (0% - 65%); депозити во овластени банки во Република Северна Македонија (0% - 100%) и пари на сметка (0% - 25%). Депозитарна банка на двата отворени инвестициски фонда е Шпаркасе Банка АД Скопје.
На седницата што се одржа денеска на 27 октомври, 2025 година Комисијата финално го усвои  Правилникот за формата и содржината на барањето за издавање на одобрение за водење на официјален регистар на регулирани информации, а откако го разгледа Предлог правилникот за официјален регистар на регулирани информации, истиот го стави на јавна расправа.
Исто така, КХВ издаде една дозвола за работење на инвестициски советник .