Комисијата за хартии од вредност на Република Северна Македонија на 82. седница, со која претседаваше претседателката на КХВ, м-р Бујаре Абази донесе Решение со кое на  Триглав Пензиско Друштво АД Скопје  му се дава одобрение за издавање на долгорочни хартии од вредност по пат на приватна понуда. Станува збор за петта емисија на 20.000 обични акции со вкупен износ од 1.000.000 евра во денарска противвредност.  Зголемувањето на основната главнина со нови парични влогови се врши за познат купувач- институционалниот инвеститор, кој е и единствен акционер со 100% учество на акционерскиот капитал на Друштвото и тоа: Заваровалница Триглав д.д Љубљана, Република Словенија.                                 
Друштвото издава нови обични акции со цел одржување на потребниот износ на главнина пропишан со Законот за доброволно финансирано пензиско осигурување. 

На седницата што се одржа денес, 12 март 2026 година КХВ финално го усвои Правилникот за Официјален регистар на регулирани информации што произлегува од новиот Закон за проспекти и обврски за транспарентност за издавачите на хартии од вредност. 
Претходно, во согласност со Законот за хартии од вредност,  подзаконскиот акт беше објавен на јавна расправа на веб-страницата на КХВ, со цел во рок од 30 дена заинтересираните страни да дадат забелешки во однос на предложениот текст на Правилникот.

Исто така, Комисијата за хартии од вредност издаде една дозвола за работење на инвестициски советник и една за инвестициски агент.