Комисијата за хартии од вредност на  Република  Северна Македонија на 29-тата седница со која претседаваше Претседателот на КХВ М-р Нора Алити , а што се одржа на 17 мај, 2019 година на "Халк Банка" АД Скопје  ѝ  одобри да издаде долгорочни хартии од вредност по пат на приватна понуда.

Со 16-тата емисија, "Халк Банка" АД Скопје ќе издаде 59.321 обична акција со номинална и продажна вредност од 10.000 денари по акција. Вкупниот износ на емисијата е  593.210.000 денари.

Емисијата се врши од средства на банката по основ на исплата на дивиденда во акции на акционерите на "Халк Банка" АД Скопје, сразмерно на нивното учество во основната главнина.

"Халк Банка" АД Скопје издава нови акции заради зголемување на нејзиниот запишан капитал.

Откако, КХВ во изминатиот период спроведе анализа на одредбите на Правилата за тргување,  како и на состојбите  на пазарот на хартии од вредност, констатира дека "Македонската берза" АД Скопје треба да изврши измена на Правилата за тргување, за што донесе Решение со кое ѝ наложи во рок од 30 дена од  денот на приемот да направи  конкретни корекции.

Попрецизно, Комисијата утврди дека е потребно да се дорегулираат Правилата за тргување поврзани со вкрстените трансакции, промените на цените на хартиите од вредност, фреквентноста на склучување на администраторски и системски блок трансакции и нивото на цени на хартиите од вредност во пријавените блок трансакции. 

Преку ваквите измени на Правилата за тргување, Комисијата се залага за воспоставување и одржување на ефикасен, сигурен и транспарентен пазар на хартии од вредност, со јасни пазарни механизми кои придонесуваат за поголема доверба кај инвеститорите, што пак ќе придонесе за негов одржлив развој.