Комисијата за хартии од вредност на  Република  Северна Македонија на 30-тата седница со која претседаваше Претседателот на КХВ М-р Нора Алити даде согласност Коста Костадиновски и Јован Дојчиновски да бидат именувани за извршни членови на Одборот на директори на Друштвото за управување со инвестициски фондови "Илирика Фунд Менаџмент" АД Скопје со што и во наредните четири години ќе ги извршуваат досегашните функции - Главен извршен директор и Извршен директор на ДУИФ "Илирика Фунд Менаџмент" АД Скопје. Исто така, Комисијата ги одобри измените на Статутот на ова друштво.

На седницата  што се одржа на 29 мај, 2019 година, КХВ даде согласност Иван Ортаковски да биде раководител на Одделот за работа со хартии од вредност на "ТТК Банка" АД Скопје во наредните две години.

Согласно Законот за инвестициски фондови, според кој КХВ нема надлежност да навлегува во содржината на поднесените документи за регистрација на приватните фондови и врши само запишување во Регистарот на приватни фондови кој го води Комисијата за хартии од вредност на Република Северна Македонија, одлучи приватниот инвестициски фонд "Канабис Инвестментс" на Друштвото за управување со  приватни фондови "АТЛАС Инвестментс" ДОО Скопје да биде запишан во Регистарот и  да  му се додели идентификациски број. КХВ не го одобрува основањето на приватните фондови, ниту пак е надлежна да врши контрола и надзор на нивната работа.

По успешно завршената јавна понуда,   друштвото за производство и промет со земјоделски и сточарски производи  "Вардар" АД Градско ги исполни условите за акционерско друштво со посебни обврски за известување, поради што Комисијата донесе Решение за запишување во  Регистарот на АДПОИ.