Комисијата за хартии од вредност на  Република Северна Македонија на  36-тата седница со која претседаваше Претседателот на КХВ М-р Нора Алити, а што се одржа денес 7 август, 2019 година на Водостопанство на РСМ АД Скопје  му одобри да издаде долгорочни хартии од вредност по пат на приватна понуда – втора емисија на акции.

Со 2-та емисија Водостопанство на РСМ АД Скопје  ќе издаде 30.000 обични акции со номинална вредност од 1.000 денари по акција и вкупен номинален износ од 30.000.000 денари. Втората емисија на акции на Водостопанство на РСМ АД Скопје се врши со уплата на нови влогови од страна на Владата на Република Северна Македонија која е единствен акционер, а истата се реализира заради создавање услови за непречено функционирање на друштвото.

На седницата Комисијата ги одобри измените и дополнувањата на Статутот на Друштвото за управување со инвестициски фондови КД Фондови АД Скопје. Статутарните измени се однесуваат на промена на називот на фирмата на друштвото. Имено, се врши измена на називот на фирмата на ова друштво кое ќе продолжи да работи со нов целосен назив Друштво за управување со инвестициски фондови Генерали инвестментс АД Скопје и скратен назив Генерали инвестментс АД Скопје. Направената измена се врши заради извршено превземање на Групацијата “КД” во која припаѓа македонското друштво за управување со инвестициски фондови од страна на Групацијата Генерали ЦЕЕ Холдинг од Чешка.