Комисијата за хартии од вредност на Република Северна Македонија на 38-мата седница со која претседаваше Претседателот на КХВ М-р Нора Алити  даде одобрение ТТК Банка АД Скопје да издаде прва емисија на корпоративни обврзници по пат на јавна понуда. Станува збор за 1.500 обврзници со поединечна продажна цена од 1000 евра. Корпоративните обврзници се капитален инструмент, со каматен принос (купонски), неограничено преносливи, во нематеријализиран облик и гласат на име. Каматната стапка ќе изнесува 3,5 проценти фиксна за целиот период.  

Согласно Одлуката за издавање на долгорочни должнички хартии од вредност на ТТК Банка АД Скопје, емисијата на корпоративни обврзници, се врши заради зајакнување на вкупниот финансиски потенцијал на банката со цел да ги оствари планираните бизнис цели. Емисијата за да биде успешна, треба да се реализира над 60 проценти.

На седницата што се одржа на 22 август, КХВ разгледа и два правилника од времен карактер и истите ќе стави на јавна расправа. И тоа:

- Правилник за изменување и дополнување на Правилникот за формата и содржината на барањето за одобрување на приватна понуда на хартии од вредност и

- Правилник за изменување и дополнување на Правилникот за документите што ги доставува издавачот на хартии од вредност при поднесување на барањето за одобрение на јавна понуда на хартии од вредност.

КХВ изрече јавна опомена на Друштвото за инвестиционо советување ЈК Морган Велтх Менаџмент ДООЕЛ Скопје, откако при непосредна редовна контрола утврди неправилност во неговото работење.