Комисијата за хартии од вредност на Република Северна Македонија на 42-рата седница со која претседаваше Претседателот на КХВ М-р Нора Алити даде одобрение Градски енергетски системи "ГЕС" АД Скопје да ја издаде втората емисија на долгорочни хартии од вредност по пат на приватна понуда. Станува збор за 4.878 обични акции со поединечна продажна цена од 100 евра. Согласно Одлуката на Собранието на акционери на "ГЕС" АД Скопје, друштвото издава хартии од вредност заради зголемување на основната главнина и создавање услови за непречено функционирање. Емисијата е наменета за познат купувач - постојниот единствен акционер Град Скопје како институционален инвеститор.

На седницата што се одржа на 7 октомври, 2019 година, Комисијата донесе Решение со кое Друштвото за земјоделско производство и трговија "Црвени Брегови" АД Неготино се запишува во Регистарот на акционерски друштва со посебни обврски за известувања. "Црвени Брегови" АД Неготино ги исполни условите да се води во Регистарот на КХВ заради успешно завршена јавна понуда.

Исто така, КХВ даде согласност Васко Митев да биде именуван за директор на брокерската куќа "Илирика Инвестментс" АД Скопје и да продолжи да ја извршува досегашната функција заклучно до 16 септември, 2023 година.
На 42-рата седница, како што и беше најавено, Комисијата го разгледа и прашањето за задолжителна котација и заклучи да поднесе иницијатива до Министерството за финансии за продолжување на рокот на нејзината примена.  КХВ смета дека иако неспецифична мерка за многу пазари на капитал, кај нас покажува резултати и дава големи придобивки за транспарентноста на пазарот, па оттаму во оваа фаза од развојот на пазарот задолжителната котација треба да продолжи,  со напомена дека како Република Северна Македонија ќе се приближува кон влез во Европската Унија, така треба да се размислува за напуштање на тој концепт,  без тоа да биде на штета на транспарентноста на пазарот на хартии од вредност.