Комисијата за хартии од вредност на Република Северна Македонија на 52-рата седница со која претседаваше Претседателот на КХВ М-р Нора Алити донесе Решение со кое на "ТТК Банка" АД Скопје и даде одобрение да ја издаде втората емисија на корпоративни обврзници по пат на јавна понуда. Се работи за 1500 корпоративни обврзници со вкупна номинална вредност од 1.500.000 евра и со каматна стапка од  2,7 %. Корпоративните обврзници кои ќе ги издава "ТТК Банка" АД Скопје се долгорочни должнички хартии од вредност како капитален инструмент, со каматен принос (купонски), неограничено преносливи, во нематеријализиран облик и гласат на име. Обврзниците ќе се понудат на Македонската берза по моделот фиксна цена со давање приоритет на налози со порано време на внес на налогот, па според тоа нивната поединечна  продажна цена изнесува 1.000 евра во денарска противвредност.

Корпоративните обврзници се субординирани и ќе бидат исплатени по намирување на обврските кон останатите депоненти и доверители на банката. Процентот за успешност на јавната понуда е над 60 проценти од вкупната емисија.

На седницата што се одржа денеска на 27 декември, 2019 година, КХВ донесе Решение со кое  на Акционерското друштво во државна сопственост за вршење на дејноста давање услуги во воздухопловната навигација "М-НАВ" АД Скопје  му се дава одобрение за издавање на четвртата емисија од 287.982 обични акции по пат на приватна понуда. Вкупната вредност на емисијата  е 287.982.000 денари. Акциите се наменети за единствениот акционер на друштвото  -  Влада на РСМ по основ на распределба на остварената добивка за 2017 и 2018 година, во вид на дивиденда по акција.

Исто така, Комисијата издаде една дозвола за работење на брокер и една лиценца за  инвестициски советник.

КХВ го усвои и Правилникот за изменување на Правилникот за документите што ги доставува издавачот на хартии од вредност при поднесување на барањето за одобрение на јавна понуда на хартии од вредност, по што истиот го стави на јавна расправа. Со предложената измена се продолжува рокот за издавање на ИПО и на иницијални општински обврзници без надоместок за Комисијата за хартии од вредност и тоа до 31.12.2020 година.