Комисијата за хартии од вредност на Република Северна Македонија на денешната седница со која претседаваше Претседателот на КХВ М-р Нора Алити го потврди новото лого на институцијата, чиј избор претходно го направи посебна Комисија, составена од еминентни универзитетски професори, дизајнери и експерти по економија и  за односи со јавност. Со тоа, КХВ има нов заштитен знак-лого. 

       По темелна анализа  на идејните решенија кои беа поднесени врз основа на  јавно објавениот Конкурс, Посебната Комисија  за избор на нов заштитен знак- лого во состав: Нехат Беќири, Редовен професор на Факултетот за уметности на Државниот универзитет во Тетово, Игор Делов, Графички дизајнер, Елена Наумовска, Вонреден Професор на Економски Факултет при УКИМ, Душко Гошевски, Комисионер и  Габриела Јовева Ѓуровска, М-р по комуникации и Главен советник за односи со јавност,  одлучи како најдобро да го избере идејното решение поднесено од  авторот Zeni Ballazhi. Едногласно беше констатирано дека идејното решение е оригинално и досега неупотребувано, адаптибилно на различни димензии, лесно препознатливо, дизајнерски и естетски конципирано, симболички и сугестивно ја имплементира и визуелизира  мисијата на Комисијата како регулатор во областа на пазарот на капитал, но ги изразува и трите столба на кои се темели мисијата на КХВ ( да ги заштити инвеститорите; да се грижи за создавање и одржување на фер, сигурен, транспарентен и ефикасен пазар на хартии од вредност и да го олесни привлекувањето на капитал со што придонесува кон економскиот раст и развој на државата), но и предизвиците кои претстојат. Идејното решение упатува на ,,отворени карти,, кои сугерираат транспарентност, чесност и отвореност на институцијата, а сончевите зраци на благосостојба и оптимизам. Преку скалилата одразува чекорење на повисоко ниво, просперитет и економски раст. Логото е едноставно и мултифункционално, остава простор да се модифицира,  со еден збор е  промотивно  и лесно се меморира. Преку сината боја и тројазичноста (македонски, албански и англиски), ги следи општествените трендови  и евроинтегративните процеси на државата. Инаку, Конкурсот беше јавно објавен на 24 јануари, 2019 година и заклучно со крајниот рок , 7 февруари, 2019 година  до Комисијата за хартии од вредност, аплицираа четворица автори, тројца со по едно идејно решение, а еден автор понуди петнаесет идејни решенија , што е во согласност со објавениот Конкурс.

       На 22 –рата седница, КХВ донесе Решение со кое на ,,Халк Банка,, АД Скопје и одобри да ја издаде петнаесетта емисија од 92.240 обични акции во вкупен износ од 922.400.000 денари. Емисијата е наменета за познат купувач-институционалниот инвеститор кој воедно е и акционер на банката - Халк Банка А.Ш. Турција. Банката издава нови акции заради зголемување на капиталот и обезбедување на оптимална адекватност на капиталот во наредниот период.