Со секој модул и тематска единица од Сертифицираната програма за портфолио менаџер, слушателите се стекнуваат со јасна слика за портфолио стратегиите кај различни класи на имот, вклучувајќи го фиксениот принос, капиталот и алтернативниот начин на финансирање. Воедно, со обуката се развиваат и вештини за проценка на основната веројатност и статистика, како и запознавање на сите инструменти и концепти на фиксениот принос и вреднување на капиталот.  

Во изминатиов период сите слушатели од првата организирана обука согласно Сертифицираната програма за портфолио менаџер која е изработена од страна на Комисијата за хартии од вредност на Република Северна Македонија во соработка со Академијата за Банкарство и Информатичка Технологија-АБИТ, а која истите ја започнаа на почетокот на минатата 2019 година, успешно го совладаа и третото ниво од обуката.

Во рамки на последното ниво слушателите ја следеа наставната програма која го опфати шестиот модул од обуката односно поконкретно портфолио менаџментот. Тие имаа можност да се запознаат со темите кои се однесуваа на теоријата на портфолиото, пазарите на капитал, инвестирањето во хартиите од вредност, како и управувањето со портфолијата на институционални и индивидуални инвеститори, мерењето на перформансите, алокацијата на средства по класи и сектори преку истакнати предавачи.

Сите слушатели кои успешно ги совладаа трите нивоа од Сертифицираната програма за портфолио менаџер, ќе се стекнат со Сертификат за учество на обуката, како и совладани три нивоа од Програмата на истата, издаден од страна на Комисијата за хартии од вредност на Република Северна Македонија и Академијата за Банкарство и Информатичка Технологија-АБИТ.