Денес, 19 март 2026 година се одржа финалето на националниот натпревар Европски квиз за пари 2026. Под менторство на професорката Билјана Ниновска, ученичките Дарија Боризовска и Сара Милковска ја освоија првата награда на овогодинешниот национален натпревар „Европски квиз за пари“, во организација на Македонската банкарска асоцијација (МБА), и поддршка од Народната банка и Комисијата за хартии од вредност.

Заедно со својата менторка, како и во придружба на одговорното лице на одделението за едукација при МБА – Јована Лозановска, тие ќе ја претставуваат Република Северна Македонија на европското финале кое ќе се одржи на 19 мај во Брисел, Белгија.

Второто место го освоија Ива Велковска и Лана Стојевска од СЕПУГС „Васил Антевски-Дрен“ – Скопје, додека третото место им припадна на Софија Гудумановски и Теодор Јованов од СЕПУГС „Васил Антевски-Дрен“ – Скопје, сите тимови предводени од професорката Билјана Ниновска.

Натпреварот оваа година привлече значителен интерес, со вкупно 644 пријавени тимови од 108 училиштa и под менторство на 129 наставници и професори. Од нив, 577 тимови учествуваа на квизот на македонски јазик, додека 67 тимови се натпреваруваа на албански јазик. Во вториот круг, одржан во просториите на МБА, учество зедоа четирите најуспешни тима од првиот круг, при што беше избран победникот на натпреварот.