Народната банка, Министерството за финансии, Комисијата за хартии од вредност, Агенцијата за супервизија на капитално финансирано пензиско осигурување и Агенцијата за супервизија на осигурувањето, во соработка со асоцијациите и институциите од приватниот и граѓанскиот сектор коишто се активни во доменот на финансиската едукација, во периодот од 16 до 22 март 2026 година, четиринаесетта година по ред ќе ја одбележат Глобалната недела на парите. Глобалната недела на парите традиционално се одбележува преку предавања за различни возрасни групи, објавување едукативни материјали од областа на финансиите на интернет-страниците, одржување работилници со физичко присуство или онлајн, како и објавување едукативни содржини на социјалните мрежи.

Темата на која е посветена годинешната глобална недела на парите е: „Разговори за паметно управување со парите“ (Smart money talks).

Во рамките на одбележувањето на Глобалната недела на парите, Комисијата и оваа година посветено ќе учествува во организацијата на првиот круг од националниот натпревар „Европски квиз на пари“ со сите пријавени учесници на кој ќе се изберат најдобрите тимови, а кој ќе се одржи на 16-ти март и реализацијата на финалниот натпревар на најдобрите тимови на националниот натпревар, којшто ќе се одржи на 19-ти при што со двата настани традиционално ќе се одбележи Глобалната недела на парите.

Во организација на Организацијата за економската соработка и развој (ОЕЦД),  Глобалната недела на парите се одбележува од 2012 година, со единствен прекин во 2020 година поради пандемијата. Досега одбележувањето е во повеќе од 176 земји во светот, при што се вклучени 32.000 организации и институции и се опфатени 71 милион деца и млади. Целта е да се зајакнува свеста на младите луѓе, од рана возраст, за значењето на финансиската писменост и потребата да стекнуваат знаења и вештини и да градат ставови и однесувања потребни за донесување разумни финансиски одлуки и за постигнување финансиска благосостојба и финансиска отпорност.

Повеќе информации за Глобалната недела на парите се достапни на врската: www.globalmoneyweek.org