Во периодот од 20 до 29 јули 2025 година, во Баку, Азербејџан, се одржа Меѓународната економска олимпијада (ИЕО), на која македонскиот тим освои две бронзени медали во конкуренција од над 250 учесници од 51 земја. Бронзени медалисти се Христијан Захарчев – СОТУ „Ѓорѓи Наумов“, Битола и Миша Веселински – ПСУ „Јахја Кемал“, Скопје. Со одличен настап ја претставија нашата земја и Сара Тошевска – ДСУ „Математичко-информатичка гимназија“, Скопје и Теа Ангелова – Меѓународно училиште НОВА, Скопје сите под менторство на проф. д-р Анета Гацовска Барандовска и ас. м-р Стево Ѓоргиев од Институт за математика, Природно-математички факултет – Скопје.

Во рамки на подготовките за олимпијадата, Комисијата за хартии од вредност одигра значајна улога преку: обезбедување експерти и едукативни материјали за финансиска писменост, поддршка при симулации и практични вежби поврзани со пазарот на капитал и интерактивни предавања за регулација, инвестирање и финансиски инструменти.

Овој стратешки ангажман овозможи учениците да ја разберат комплексноста на финансиските пазари, што беше особено важно за натпреварот, кој вклучуваше делови за финансиска писменост и изработка на бизнис план.