Заради едукација на потенцијалните инвеститори и заштита на нивните права во рамките на оваа кампања, Комисијата за хартии од вредност подготви и објави кратка брошура под наслов „Секогаш поставувајте прашања-прашања кои ќе Ви помогнат да донесете добра инвестициска одлука“ со прилог едукативен прашалник “Инвестирање: кога, како и каде”. Оваа публикација е достапна за сите посетители на веб страната на Комисијата, кои можат да го одговорат Прашалникот и да добијат повеќе информации за инвестирањето на пазарот на хартии од вредност.

Исто така, по повод Деновите на финансиска писменост, ученици од Средното економско-правно училиште “Арсени Јовков”од Скопје имаа еднонеделна  практична настава во Комисијата со вкупно 20 часа.

Едукацијата за учениците се спроведуваше според однапред утврдена програма која беше изготвена заедно со наставниците од средното економско училиште. Вработените во Стручната служба на Комисијата, кои беа определени како ментори, предаваа на повеќе теми, а кои се однесуваа на функционирањето на пазарот на хартии од вредност и работата на регулаторот преку видео презентации, разгледување на веб страни, видео записи, квизови, пишани материјали, акти, како и запознавање со надзорната станица за следење на тргувањето со хартии од вредност, аналитиката на овластените учесници на пазарот на хартии од вредност и регистрите кои се водат. 

На крајот од наставата, на учениците, Комисијата им додели потврди за успешна совладана практична настава.