Тргнувајќи од фактот дека   добрата пракса на корпоративно управување, јакнењето на свеста за неговaтa вредност  и усогласената институционална рамка од сите државни органи кои ги спроведуваат законите претставуваат значајни фактори во развивањето на ефикасен пазар на капитал и воспоставување на здрава инвестициска клима, Комисијата за хартии од вредност на Република Северна Македонија и Академијата на судии и обвинители Павел Шатев на 11 ноември, 2020 во Скопје организираа советување на тема: „ Правните лекови во постапките за упис во трговскиот регистар во корелација со правната заштита предвидена во Законот за трговските друштва и другите закони “ .

       На ова советување судии од граѓански оддели, стручни соработници од сите апелациони подрачја, судии од Управниот суд и Вишиот управен суд, како и овластени учесници на пазарот на хартии од вредност интерактивно дискуситираа  со излагачите д-р Марко Андонов, редовен професор и декан на Факултет за правни науки, Универзитет Американ Колеџ Скопје, Наташа Савовска Димитровска, судија на Апелационен суд Скопје и  Мате Стојановски, главен правен советник, Комисија за хартии од вредност за актуелни правни прашања од областа на пазарот на капитал во делот на работењето на акционерските друштва, издавањето на нови хартии од вредност, за задирање во сопственоста на сопствениците/вложувачите во хартии од вредност, а поврзано со спроведувањето на уписите во трговскиот регистар кој се води во Централниот регистар на РСМ.

       Се отворија и поодделни делови од важечката законска рамка со кои се пропишуваат правните лекови во постапките за упис во трговскиот регистар во корелација со правната заштита предвидена со Законот за трговските друштва и другите закони во кои се уредуваат посебните управни постапки во кои се носат конкретни правни акти кои потоа се дел од постапките за упис поведени пред Централниот Регистар на РСМ.

 Со ова советување кое беше иницирано  и спроведено  во рамки на традиционално добрата меѓусебна соработка на двете институции, Комисијата за хартии од вредност на Република Северна Македонија и Академијата на судии и обвинители Павел Шатев  заеднички  ја продлабочуваат заложбата да се почитуваат законите, а притоа судовите и државните органи да бидат  доволно обучени да ги толкуваат и применуваат законите, бидејќи тоа е  врвен приоритет за воспоставување на правна сигурност од која пак зависи и подобрувањето на економскиот амбинет, привлекувањето на нови инвеститори и севкупно за општествено економскиот напредок на земјата.