Пандемијата со вирусот  COVID-19 ja наметна потребатa од зголемување на безбедноста од сајбер нападите врз информативните системи во финансискиот сектор, поради што во светски рамки се зголеми неопходноста од интензивирано јакнење на механизмите за заштитa од  нив.

Безбедноста на информациите ги заштитува истите од низа закани, со цел да обезбеди непрекинато работење, да се минимизира деловната штета и во таа насока да се оправдаат инвестициите за безбедноста на информациите.

Затоа, сите финансиски регулатори, институции и организации на светско ниво веќе ја констатираат потребата од преземање на меѓународни активности со кои координирано ќе се постигне поголема отпорност на финансискиот сектор од сајбер нападите на информативните системи.

Во таа насока, Комисијата за хартии од вредност на Република Северна Македонија се приклучи кон кампањата  “Европски месец на сајбер безбедност”, месец кој државите членки и земјите пристапнички на Европската Унија го одбележуваат со цел нотирање на потребата од едукација од областа на сајбер безбедноста и паметната употреба на интернетот, уредите и на  електронските сметки.

Комисијата за хартии од вредност подготви неколку едукативни флаери и постери на тема  “Едуцирај се за сајбер безбедност - Заштитете ги Вашите on-line сметки”  со цел да укаже на потребата од едукација за сајбер безбедност и воедно да му помогне на секој потенцијален инвеститор, учесник на пазарот на капитал, како и на оној кој пристапува и користи интернет и on-line платформи, навреме да ги увиди ризиците и да се заштити од потенцијален сајбер-напад. Едукативниот материјал содржи и соодветни предупредувања и чекори кои треба да се преземат при подобрување и заштита од потенцијални видови на сајбер-закани и сајбер-криминал https://www.sec.gov.mk/Aktivnosti.

Со сето ова, Комисијата за хартии од вредност, се вклучува во активно подигање на јавната свест за значењето на сајбер-безбедноста, со мисија да обезбеди услови за потенцијалните инвеститори и сите учесници на пазарот на хартии од вредност за безбедно користење на интернетот и on-line работењето.

Во таа насока, Комисијата на својата веб страна објави едукативен квиз/прашалник преку кој секој поединец  ќе може  да го провери своето знаење на темата сајбер безбедност, како и правилната употреба на достапните интернет алатки и on-line платформи https://www.sec.gov.mk/Kvizovi.