Во Комисијата за хартии од вредност, учениците од Средното економско-правно училиште “Арсени Јовков” од Скопје имаа вкупно 20 часа практична настава на теми  кои однапред беа утврдени со нивните наставници.

На часовите, учениците од своите ментори-вработени во Стручната служба на КХВ имаа можност да научат за функционирањето на пазарот на хартии од вредност и за работата на Комисијата за хартии од вредност и тоа преку видео презентации, разгледување на веб страни, видео записи, квизови и разгледување на пишани материјали, конкретни акти, како и запознавање со надзорната станица за следење на тргувањето со хартии од вредност, аналитиката на овластените учесници на пазарот на хартии од вредност и регистрите кои Комисијата ги води.   На крајот од реализираните часови од практичната настава, на учениците Комисијата за хартии од вредност им додели потврди за успешна совладана практична настава.

Ваквата практична настава на учениците им овозможува да се запознаат и да стекнат одредено работно искуство, што е задолжителен елемент од секој наставен план за квалификација во стручното образование за занимање во нашата земја. Овој процес се базира на меѓусебна соработка помеѓу учениците, наставниците и менторите и е насочен кон примена на претходно акумулираните знаења.

Еднонеделната практична настава за учениците од средното стручно училиште, насока-економски техничар се реализираше согласно Меморандумот за соработка склучен помеѓу Комисијата за хартии од вредност на Република Северна Македонија и Средното економско-правно училиште “Арсени Јовков” од Скопје.