Комисијата за хартии од вредност, Македонската банкарска асоцијација и Народната банка ги наградија учениците со најдобри резултати на Европскиот квиз на парите и нивните ментори

Активностите во сферата на финансиската едукација се и мора и натаму да бидат еден од приоритетите. Тоа се потврдува и во текот на ковид-кризата, којашто и покрај нејзиниот карактер не ги запре активностите за поттикнување повисока финансиска писменост. Конкретна потврда е овогодинешното издание на Европскиот квиз на парите, коешто заради пандемијата се одржа преку онлајн-платформи. На националниот натпревар учествуваа близу 500 ученици, а на големото европско финале најбројни беа учесниците од нашата земја, што уште еднаш потврдува дека вложувањата во финансиската едукација во изминатиот период даваат резултати, особено кај помладата популација.

Денес, во Македонската банкарска асоцијација (МБА) се одржаа средби со европскиот вицешампион Христијан Андовски и со учениците коишто остварија најдобри резултати на националниот натпревар – Едон Хамбари,  Андреј Шумански и Антонио Јорданоски, како и со нивните ментори Мерита Таири, Александра Бошковска-Спасовска и Илчо Јорданоски. На средбата беа доделени наградите за остварениот успех.

Честитајќи им за постигнатиот успех, на натпреварувачите и на нивните ментори им беа врачени и симболични подароци од Комисијата за хартии од вредност, Македонската Банкарска Асоцијација, како и од Народната банка.

Инаку, учеството на нашата земја на Европскиот квиз на парите е во организација на Македонската банкарска асоцијација, во соработка со Комисијата за хартии од вредност и Народната банка, со поддршка од Министерството за образование и наука и Министерството за финансии.