Во просториите на Македонската банкарска асоцијација денес, 28 мај 2024 година,  се одржа свеченото доделување на наградите на победниците од националното финале на Европскиот квиз на пари за 2024 година.

На средбaта, претседателката на МБА, д-р Маја Стевкова-Штериева, гувернерката д-р Анита Ангеловска-Бежоска и претседателката на Комисијата за хартии од вредност м-р Нора Алити, ги поздравија победничките тимови на овогодишниот национален натпревар „Европскиот квиз на пари“: првопласираните Кирил Китевски и Кристијан Лазароски од СОУ „Цар Самоил“ Ресен со менторката Дијана Ѓоргиевска, кои ја претставуваа нашата земја на европското финале на 19 април во Брисел, Белгија; второпласираните Стефани Георгиевска и Филип Клобучински од СЕПУГС Васил Антевски-Дрен – Скопје со менторката Билјана Ниновска и третопласираните Лара Росоманска и Елена Ризова од СОУ Гимназија „Добри Даскалов“ Кавадарци со менторката Лоска Давчева.

Најдобрите три тима на Европскиот квиз на пари за 2024 година, Кирил Китевски и Кристијан Лазароски, Стефани Георгиевска и Филип Клобучински, и Лара Росоманска и Елена Ризова, за извонредниот успех на натпреварот беа наградени со награди од Македонската банкарска асоцијација, Народната банка и Комисијата за хартии од вредност на Република Северна Македонија. Исто така, изразуваме благодарност до посветените наставници кои ги водеа тимовите до победа.

Со освојувањето на првото место на националниот натпревар, победничкиот тим Кирил Китевски и Кристијан Лазароски ја претставуваше Северна Македонија во финалето на Европскиот квиз за пари, кое се одржа во Брисел на 19 април 2024 година, и каде што го освоија третото место. Во битката за финалето учествуваа 36.000 тинејџери од 2.200 училишта низ Европа. Во конкуренција на 26 европски земји, првото место го освои тимот од Австрија, второто место тимот од Чешка, а третото место тимот од Северна Македонија. Оваа иницијатива за промовирање на финансиската едукација е поддржана од националните банкарски асоцијации во Европа под координација на Европската банкарска федерација и е дел од низата активности организирани во над 30 земји за време на Европската недела на пари.