На 27 февруари 2026 година се одржа подготвителна средба во пресрет на националниот натпревар „Европски квиз за пари 2026“, во организација на Македонска банкарска асоцијација, во соработка со Народна банка на Република Северна Македонија и Комисија за хартии од вредност на Република Северна Македонија.

На средбата учествуваа претставници на институциите-организатори, како и менторите и тимовите на ученици од пријавените основни и средни училишта од целата држава. Присутните беа детално запознаени со правилата и форматот на натпреварот, а им беа доставени и насоки и едукативни материјали со цел што поуспешна и поквалитетна подготовка.

Организаторите изразуваат особено задоволство од рекордниот интерес за учество годинава, што претставува јасен показател за зголемената свест за значењето на финансиската писменост кај младите. „Европскиот квиз за пари“ не е само натпревар, туку платформа преку која учениците ги продлабочуваат своите знаења за финансиските концепти, одговорното управување со личните финансии и функционирањето на финансискиот систем – вештини што се клучни за нивната иднина.

Годинава, националниот натпревар се организира по осми пат, со вкупно 1.276 пријавени ученици – 1.144 на македонски и 132 на албански наставен јазик – под менторство на 127 наставници од 109 основни и средни училишта од целата држава. Овие бројки потврдуваат дека финансиската едукација станува сѐ поважен сегмент од образовниот процес.

Националниот натпревар ќе се одржи во рамки на Глобалната недела на парите, во периодот од 16 до 22 март 2026 година. Најдобрите двајца ученици ќе ја претставуваат нашата земја на европското финале, кое ќе се одржи на 18 и 19 мај 2026 година во Брисел, Кралството Белгија.

Македонска банкарска асоцијација, Народна банка на Република Северна Македонија и Комисија за хартии од вредност на Република Северна Македонија остануваат цврсто посветени на континуирано унапредување на финансиската писменост кај младите и на зајакнување на нивната подготвеност за носење информирани, одговорни и одржливи финансиски одлуки во современото општество.