Скопје, 31 март 2026 година

Македонска берза одбележа 30 години од своето постоење - значаен јубилеј што ја потврдува нејзината улога како клучна институција во развојот на пазарот на капитал во земјава. На настанот присуствуваа претставници на институции, регулатори, учесници на пазарот на хартии од вредност и гости од земјата и регионот, кои заеднички ги одбележаа трите децении развој на организираното тргување со хартии од вредност. Претседателката на Комисијата за хартии од вредност, м-р Бујаре Абази, во своето обраќање истакна дека во изминатите три децении Берзата се развиваше во различни економски и општествени околности, при што успеа да изгради стабилен, транспарентен и кредибилен пазар.

„Три децении не се само бројка – тие се доказ за визија, посветеност и верба дека пазарот на капитал има суштинска улога во развојот на економијата. Берзата е повеќе од платформа за тргување – таа е простор каде што идеите се поврзуваат со капиталот, а ризикот со одговорноста“, истакна Абази. Таа нагласи дека развојот на пазарот не е само прашање на регулатива, туку и на доверба, додавајќи дека Комисијата останува доследна на принципите на интегритет, заштита и одговорност.

Претседателката на Комисијата за хартии од вредност информираше дека во наредниот период се очекува имплементација на новата законска рамка за пазарот на капитал, која ќе придонесе за поголема усогласеност со европските стандарди, зајакнување на регулаторниот капацитет и подобра заштита на инвеститорите.

Беше истакната и поддршката од Европската комисија за подготовка на тригодишна стратегија за регулаторно и институционално зајакнување, како и активностите за продлабочување на регионалната соработка, вклучително и претстојното потпишување Меморандум за координирана регулација и надзор со повеќе европски регулатори.

И покрај постигнатите резултати, како што нагласи Абази, остануваат предизвиците, како што се ниската ликвидност и ограничениот број издавачи и институционални инвеститори, при што се очекува реформската рамка и регионалната интеграција да придонесат кон нивно ублажување.

Настанот претставуваше можност за одбележување на досегашните достигнувања, но и за отворање нова фаза во развојот на македонскиот пазар на капитал, со јасен фокус на стабилноста, довербата, дигитализацијата и финансиската писменост.

Комисијата за хартии од вредност доби Благодарница од Македонската берза АД Скопје за долгогодишна успешна соработка.