Претседателката на Комисијата за хартии од вредност М-р Нора Алити се обрати на свеченоста  по повод одбележувањето на 30 години од постоењето на Комисијата за хартии од вредност. Во продолжение е целото обраќање на Претседателот на КХВ Нора Алити:

,,Ми претставува чест  да се обратам на првиот ден од четвртата декада на Комисијата за хартии од вредност и да Ви посакам добредојде.Триесет години постоење е долг период во кој сите ние од Комисијата за хартии од вредност ќе го паметиме како време во кое трудољубиво ги поместувавме границите на сопствените достигнувања.

Комисијата за хартии од вредност била и останува носечки елемент за етаблирање  и за развој на пазарот на капитал, неговиот пробив кон инвеститорите и реалните дострели.
Заслуженото место  што денес Комисијата го има  во финансискиот систем е постигнување за кое се имаат заложено многу поединци, како поранешни Претседатели, членови на Комисијата, вработени.

 Но, тoa не би било возможно, ниту пак доволно, без идеите и иницијативите на пазарните учесници, без поддршката и плодната соработка со Собранието, Владата, Министерствата, Народната Банка, како и без добрaта интеракција со другите регулаторни тела, за што денеска, ја изразувам мојата Благодарност.

Довербата и интегритетот на пазарот на капитал за нас е “јавното добро” што грижливо и одговорно го чуваме, и правиме тоа да биде неисцрпливо и неисклучиво достапно. 

Дигитализацијата, одржливоста, доброто управување и прецизната регулација, како и растечката и императивна цел за заштита на финансиската стабилност од страна на пазарот на хартии од вредност, се суштински елементи за неопходното зајакнување на довербата, и за вклучување на различни структури на инвеститори  на пазарот.

 Во таа насока , европската регулаторна агенда е јасен отсјај на целта  кон која сме свртени, но и поттик за важноста од интегрирање на факторите на животната средина, општествената одговорност и управување, при спроведување на финансиската активност.

Силната корелација помеѓу пазарите на капитал и економскиот раст, треба што побрзо и подобро да се искористи. Оттука, Комисијата останува посветена во спроведувањето на сите мерки и активности под нејзина надлежност предвидени во Стратегијата за развој на финансиските пазари со посебен фокус на пазарот на капитал, неодамна усвоена од Владата на предлог на Министерството за финансии. 

Несомнено, развојот на пазарот на капитал ќе одигра многу важна улога во забрзувањето на економскиот раст. 

Започнувањето на процесите на зелена и дигитална трансформација на економијата претставува голема шанса за пазарот на капитал. За нас, како регулатор особено е важно преку нефинансиското известување да го наметнуваме три “P” пристапот (planets, profit and people) во мајндсетот на акционерските друштва. 

Дигитализацијата на економијата и нејзиното зазеленување се можеби најдобрите две работи во идниот период кои треба да бидат излезот на пазарот на капитал од движењето во кружниот тек.  

Финансирањето на зелената и дигиталната транзиција е веќе на врвот на приоритетите на земјите од Европската Унија. Новиот Кодекс за корпоративно управување е добра и солидна основа, котираните акционерски друштва да доставуваат квалитетни нефинансиски информации за областите поврзани со ESG.

Дигитализацијата во корелација со зголемената грижа за животната средина, ќе ја одбележи економијата на иднината. Ова се  извонредни моменти за нашиот пазар на капитал кои ќе доведат до подобра ефикасност и квалитет на деловните процеси.

Неизбежно е, се повеќе инвеститорите да ги земаат предвид ESG факторите како клучни за инвестирање.  

Нашиот таргет како регулатор, е овие големи можности и предизвици за финансискиот сектор, да ги споиме со инвеститорскиот фокус. 

Затоа, лидершипот на Комисијата продолжува со доброто управување  и со алокација на ресурсите кон точките на нивната најпродуктивна употреба, но за резултатите ќе се зборува на наредниот јубилеј , Вам  почитувани присутни Ви благодарам што заеднички ги  споделуваме овие свечени моменти.